Adroddiad bwlch cyflog rhwng y rhywiau 2024

Mae'r adroddiad hwn wedi'i baratoi yn seiliedig ar y gweithlu ar 31 Mawrth 2024 a'r cyfnod cymharu uniongyrchol yw 31 Mawrth 2023.

Rydym yn cadarnhau bod y data bwlch cyflog rhywedd sy’n cael ei gynnwys yn yr adroddiad hwn yn gywir ac wedi cael ei lunio yn unol â'r cyfarwyddyd a gyhoeddwyd gan yr Adran Addysg.

Pwrpas adrodd ar y bwlch cyflog rhywedd yw darparu cymhariaeth o'r cydbwysedd rhwng dynion a menywod o fewn ein strwythur graddau cyflog mewnol yn hytrach na thynnu sylw at anghydbwysedd o ran cydraddoldeb cyflog ar gyfer rolau cyfartal. O gymharu â 2023, mae ein bwlch cyflog rhywedd wedi cynyddu 0.7% o 1.6% i 2.3%. 

Cymerir rhagofalon gofalus i beidio â chyflwyno tuedd cyflogau yn Gyrfa Cymru ac rydym yn cadw'n llym at ein Polisi Gwobrwyo a Thâl a'n polisïau recriwtio. Mae pob swydd yn destun proses werthuso swydd allanol. Mae cynnydd yn seiliedig ar amser a wasanaethir gyda'r cwmni yn unig. Hefyd, rydym wedi cyflwyno rhaglen datblygu arweinyddiaeth i bawb sydd mewn swyddi gradd 6 a 7, ac mae hynny wedi annog cynnydd yn ystod y cyfnod hwn.

Datgeliad, rwy’n cadarnhau bod ein data wedi'i gyfrifo yn unol â gofynion Rheoliadau Deddf Cydraddoldeb 2010 (Gwybodaeth am y Bwlch Cyflog Rhywedd) 2017.

Nikki Lawrence,
Prif Weithredydd

Trosolwg

Cyfanswm nifer y staff ar y gyflogres ar 31 Mawrth 2024 oedd 635 o gymharu â 628 ym mis Mawrth 2023.

Mae’r gweithlu yn cynnwys mwy o fenywod nac o ddynion, gyda 76.5% yn fenywod yn 2024, gostyngiad bach o 76.94% yn 2023. Gall newid yn y gyfran o staff benywaidd o gymharu â dynion, neu i'r gwrthwyneb, gael effaith sylweddol ar y bwlch cyflog rhywedd.

Wrth gyfrifo ein bwlch cyflog rhywedd, mae'n ofynnol i ni seilio ein ffigurau ar gyfraddau cyflog fesul awr mis Mawrth ar gyfer y flwyddyn adrodd honno.

Er bod y niferoedd yn dangos bod ein bwlch cyflog rhywedd wedi cynyddu 0.7% o 1.6% i 2.3% yn ystod y cyfnod hwn, mae hyn yn gamarweiniol gan fod y ffigur wedi'i ystumio gan daliadau cyfandaliad ôl-ddyddiedig a wnaed ym mis Mawrth 2023 i'r rhai sydd o fewn cwmpas yr ymarfer cydraddoldeb cyflog.

O beidio â chynnwys y taliadau hyn, mae ein bwlch cyflog rhywedd yn parhau i fod yn 1.6%, sy'n sylweddol is na ffigur cyffredinol Cymru o 8.9% yn 2024 (Arolwg blynyddol o oriau ac enillion 2024).

Wrth recriwtio, er mwyn sicrhau tegwch i bawb, rydym yn penodi ar sail teilyngdod ac mae ein ffocws ar y gallu a'r sgiliau sydd eu hangen i gyflawni'r swydd. Rydym yn sicrhau bod ein prosesau recriwtio yn dileu tuedd annheg drwy sicrhau bod pob ffurflen gais yn cael eu gwneud yn ddienw cyn cael eu hasesu ac rydym yn defnyddio cyfweliadau strwythuredig a chanolfannau asesu sgiliau lle bo hynny'n briodol.

Yn ystod ein proses recriwtio, rydym yn cydnabod anghenion amrywiol gwahanol aelodau’r gweithlu, a'n hegwyddorion sylfaenol yw sicrhau bod cydraddoldeb, amrywiaeth, cynhwysiant a thegwch wedi'u hymwreiddio ymhob rhan o Gyrfa Cymru.

Hunaniaeth rhywedd

Rydym yn cydnabod bod rhywedd yn fwy cymhleth na dim ond "dynion" a "menywod". Mae'n debygol bod gennym ni aelodau staff nad ydynt yn ffitio o fewn y categorïau deuaidd ac sydd o bosib yn diffinio eu hunain fel anneuaidd ac eraill sydd efallai’n ystyried nad ydynt yn cyd-fynd â'r rhywedd a neilltuwyd iddynt pan gawsant eu geni. Fodd bynnag, oherwydd y ddeddfwriaeth sydd ar waith, mae'n rhaid i ni adrodd am y bwlch cyflog rhwng y rhywiau o ran dynion a menywod. Rydym wedi defnyddio'r data hawl i weithio a ddarparwyd ar ddechrau cyflogaeth i ddyrannu staff fel dynion neu fenywod at ddibenion yr adroddiad hwn.

Newidiadau i'r gweithlu yn y cyfnod hwn

O gymharu â gweithlu 2023, rydym yn adrodd cynnydd o 7 aelod staff. Dechreuodd 13 o weithwyr gwrywaidd a gadawodd 8 o weithiwr gwrywaidd. Dechreuodd 32 o weithwyr benywaidd a gadawodd 30 o weithwyr benywaidd.

Cyflog cyfartalog y rhai gwrywaidd a oedd yn dechrau oedd £15.20 o gymharu â £15.49 ar gyfer y dynion a oedd yn gadael. Cyflog cyfartalog y rhai benywaidd a oedd yn dechrau oedd £13.69 o gymharu â £17.08 ar gyfer y benywod a oedd yn gadael.

Bwlch cyflog cymedrig

Mae'r bwlch cyflog cymedrig yn cael ei gyfrifo trwy adio cyflog yr awr yr holl fenywod mewn sefydliad a'i rannu â nifer y menywod, gan wneud yr un swm ar gyfer y dynion, ac yna cymharu'r ddau ffigur. Er bod dynion yn cyfrif am ddim ond 23% o'r gweithlu, mae eu cyflog cymedrig 1.6% yn uwch na menywod.

Rydym wedi gweld bod nifer o resymau pam mae hyn yn wir. Nid yw cyfran y dynion yn y graddau cyflog uwch 6 ac 8 yn gynrychiadol o’r boblogaeth gyffredinol. Mae mwy na 40% o ddynion mewn swydd ar y ddwy radd hyn ac mae hyn wedi cynyddu o gymharu â 2022. Mae'r cynnydd yn y grwpiau hyn wedi'i wrthbwyso ychydig gan y cynnydd yn nifer y dynion sydd ar radd 3. Mae hyn arwain at gynnydd yn y bwlch cyflog o 0.1%.

Bwlch Cyflog Canolrifol

Mae'r bwlch cyflog canolrifol yn cael ei gyfrifo trwy ddod o hyd i'r union bwynt canol rhwng y fenyw ar y cyflog isaf a’r fenyw ar y cyflog uchaf mewn sefydliad a'r dyn ar y cyflog isaf ac ar y cyflog uchaf, yna cymharu'r ddau ffigur i gyfrifo'r gwahaniaeth mewn cyflogau.

Rydym yn adrodd gwahaniaeth o 0% yn y bwlch cyflog canolrif. O'r strwythur graddio a nodir isod (Ffigur 2) mae 62.53% o'r staff benywaidd a 56.66% o'r staff gwrywaidd yn cael eu cyflogi ar radd 4, felly mae'r cyflog ar gyfer yr aelod canolrifol o staff gwrywaidd a benywaidd yr un peth.

Mae ein darpariaeth gwasanaeth craidd yn cynnwys darparu cyngor ac arweiniad gyrfaoedd felly mae’r canran uchaf o'n staff, yn seiliedig ar swydd benodol, yn gynghorwyr gyrfa gradd 4.

Chwartelau Cyflog

Mae chwartelau cyflog yn fesurau ystadegol a ddefnyddir i ddadansoddi dosbarthiad cyflogau o fewn sefydliad neu ar draws diwydiant penodol. Maen nhw’n rhannu'r data yn bedair rhan gyfartal, gan ddarparu darlun clir o sut mae iawndal yn cael ei ddosbarthu ymhlith gweithwyr.

Mae chwartelau cyflog yn cael eu cyfrifo trwy drefnu pob cyflog mewn trefn esgynnol ac yna eu rhannu'n bedwar segment cyfartal. Mae pob segment yn cynrychioli 25% o'r set ddata.

Yn hanesyddol, mae darpariaeth cyngor gyrfa wedi’i ddominyddu gan fenywod, a bydd yn cymryd peth amser i fynd i'r afael â'r anghydbwysedd hwn. Nid yw'r ganran uchel o fenywod o gymharu â dynion yn golygu na allwn gyrraedd cydraddoldeb cyflog. Yr hyn sy’n bwysig er mwyn sicrhau tegwch yw cyfran y staff sy’n cael eu seilio ar gymhariaeth chwartel i chwartel. 

Y gymhareb o aelodau staff benywaidd i aelodau staff gwrywaidd yw 76:24 ar gyfer y cwmni yn ei gyfanrwydd – mae hyn wedi cynyddu o 75:25 yn 2021. Fodd bynnag, yn y sefydliad cyfan mae menywod mewn 71.34% o swyddi'r chwartel uchaf, gan arwain at fwlch cyflog rhwng y rhywiau o 1.7%.
 

Meysydd i ganolbwyntio arnynt:

• Adolygu ein harferion recriwtio a dethol i ddenu ystod amrywiol o ymgeiswyr trwy gael gwared ar rwystrau. Mae hyn yn cynnwys mynd i'r afael â'r "bwlch hyder" a allai effeithio'n andwyol ar amrywiaeth yr ymgeiswyr sy'n gwneud cais.
• Cynnal cyfweliadau aros i archwilio unrhyw rwystrau i ddilyniant
• Monitro cyfraddau cadw i nodi unrhyw faterion a thueddiadau posibl
• Adolygu ein polisïau i sicrhau eu bod mor hygyrch ac mor gynhwysol â phosibl
• Cynnal hyfforddiant asesu effaith cydraddoldeb gyda rheolyddion ar draws y cwmni, gan fabwysiadu dull croestoriadol
• Ymgysylltu â'r gweithlu i ddatblygu Polisi Gofalwyr

Archwilio