Cynllun Gweithredol

Cefnogi pobl ifanc ac oedolion i bontio’n gadarnhaol i addysg, gwaith neu hyfforddiant, gan gynnwys prentisiaethau, a deall y sgiliau sy’n ofynnol i lwyddo yn y farchnad lafur a chyfrannu at economi Cymru yn y dyfodol.

Bydd pob unigolyn ifanc sy'n mynychu ysgol brif ffrwd yn cael cynnig o gyfweliad cyfarwyddyd ac anogaeth gennym ni. Bydd y cynnig yn cael ei wneud drwy ystod o sianeli, ee yng ngwasanaethau’r ysgol, mewn grwpiau dosbarth, yn y cytundeb partneriaeth gyda'r ysgol, mewn negeseuon testun awtomataidd, a thrwy gysylltu ag unigolion lle bo angen. Gall cymorth ddigwydd unrhyw bryd rhwng Blwyddyn 9 a Blwyddyn 11 ac rydym yn anelu at o leiaf 80% o bobl ifanc yn cael cyfweliad cyfarwyddyd ac anogaeth erbyn iddynt adael addysg orfodol. Darperir cyfweliadau un-i-un ac mewn grwpiau bach.

Byddwn yn cynnig dwy sesiwn gwasanaeth i bob ysgol, un ar gyfer CA3 ac un ar gyfer CA4, i godi ymwybyddiaeth am y cynnig ac i gwmpasu pynciau y gofynnir amdanynt ac y cytunwyd arnynt gydag ysgolion unigol.

Bydd yr arolwg Gwirio Gyrfa yn cael ei gynnig i bob ysgol i gynorthwyo gyda blaenoriaethu a chasglu data. Bydd hyn yn ein cefnogi ni i nodi pa bobl ifanc sydd:

• Heb ffocws
• Yn chwilio am brentisiaeth
• Yn dalentog ond yn tangyflawni
• Yn newydd-ddyfodiaid i'r farchnad lafur
• Â diffyg hyder neu gymhelliant i wneud i bethau ddigwydd
• Yn afrealistig

Byddwn yn cynnal cyfweliadau un-i-un wedi eu targedu yn ystod tymor y Pasg ar gyfer pobl ifanc sy’n ceisio cael gwaith neu hyfforddiant ar ôl Blwyddyn 11, gan arwain at gwblhau Adroddiadau Asesu ac Atgyfeirio ar gyfer rhaglen Twf Swyddi Cymru + neu gymorth i ddod o hyd i waith.

Bydd cynghorwyr Cymru’n Gweithio yn cefnogi pobl ifanc sy’n chwilio am gyfleoedd cyflogaeth neu hunangyflogaeth yn syth o Flwyddyn 11, gydag atgyfeiriadau i Cymru’n Gweithio yn cael eu gwneud yn ystod tymor yr haf.

Darperir cyfweliadau cyfarwyddyd ac anogaeth ar gyfer y bobl ifanc hynny mewn addysg ôl-16 sy'n gofyn am gymorth.

O fis Medi ymlaen, byddwn yn peilota defnyddio system archebu ar-lein newydd ar gyfer dysgwyr addysg bellach, a fydd yn gallu trefnu eu hapwyntiadau eu hunain yn ogystal â staff coleg yn gallu trefnu apwyntiad ar eu rhan.

Bydd cynghorwyr gyrfa yn mynd ar drywydd pobl ifanc Blwyddyn 11 sydd wedi’u nodi fel Haen 4 ² ar ôl iddynt drosglwyddo i’r chweched dosbarth neu addysg bellach.

Byddwn yn cynnig sesiwn grŵp i bob ysgol chweched dosbarth, gyda blaenoriaeth yn cael ei rhoi i ddysgwyr sydd am ymuno â'r farchnad lafur.

² Pobl ifanc mewn cyflogaeth, addysg neu hyfforddiant ond mewn perygl o roi'r gorau iddi.

Digidol a Chyfathrebu

Er mwyn gwella profiad y cwsmer, byddwn yn parhau i alinio gweithgareddau cyflogadwyedd yn well ar draws y gwasanaeth Cyswllt a Cymru'n Gweithio yn ogystal â pharhau i gyflwyno’r ffrydiau gwaith ar y canlynol:

• Cyfarwyddyd ymateb cyflym
• Sesiynau cyflogadwyedd digidol Cymru gyfan
• Llwybro galwadau (gwahanu galwadau gweinyddol a chymorth gyrfa)
• Pan nad oes anogydd cyflogadwyedd ar gael mewn canolfan, sicrhau trosglwyddiad llyfn drwodd i'r gwasanaeth Cyswllt

Byddwn yn rhyddhau camau 3 a 4 o Swyddi Dyfodol Cymru, a fydd yn golygu y byddwn yn ychwanegu’r diwydiannau/sectorau 12/13 eraill at y wefan, gan gwblhau’r pecyn cyfan i’n cwsmeriaid ei ddefnyddio i lywio eu penderfyniadau.

Byddwn yn datblygu cynnig ar gyfer datblygu ein cyfleuster Chwilio am Swydd ymhellach ar y wefan, ac yn cynllunio hyn ar y map trywydd yn unol â hynny.

Gan ddefnyddio’r gweithgareddau ymchwil, profi a gwerthuso o’r ‘cynllun ar gyfer ffrydiau gwaith yn y dyfodol’ ar ein gwefan, byddwn yn blaenoriaethu gweddill y map trywydd digidol ar gyfer 2024 i 2025  a thu hwnt. Mae'r meysydd gwaith yn cynnwys personoli ac addasu (gan gynnwys deallusrwydd artiffisial), offer cael swydd, offer gwneud penderfyniadau ac asesiadau sgiliau.

Byddwn yn dylunio ac yn cyflwyno ymgyrchoedd sy'n ystyried y newidiadau yn ein cynnig ar draws yr holl wasanaethau. Bydd y rhain yn dal i gefnogi pwyntiau pontio ac yn hyrwyddo ein gwasanaethau i'n grwpiau cwsmeriaid allweddol, gan gynnwys pobl ifanc, rhieni, cyflogwyr, a'r rhai yn y farchnad lafur. Ffocws allweddol y flwyddyn fydd cyflwyno, fel rhan o'r ymgyrchoedd addysg bellach / ôl-16, y defnydd o fframwaith OASIS ac integreiddio gwyddor ymddygiadol i gefnogi gweithgarwch ymgyrchu mwy effeithiol.

Byddwn yn gweithredu gwelliannau i'r patrymau gwaith o fewn Gwybodaeth am Swyddi a nodwyd yn 2023 i 2024 ac yn adolygu elfennau pynciau ac erthyglau'r cymhwysiad i nodi bylchau a gwella cywirdeb ar gyfer ein cwsmeriaid.

Byddwn yn parhau i ddatblygu a mireinio llinyn Fy Nyfodol ar y wefan, gan gynnwys cynhyrchu mwy o fideos Sôn am Swyddi.

Byddwn yn adolygu ac yn diweddaru gwaith grŵp, gan ei ailbecynnu fel adnodd oddi ar y silff i athrawon ei ddefnyddio.

Dangosydd Perfformiad Allweddol

Mae 95% o'r disgyblion sy'n derbyn gwasanaeth cyfarwyddyd ac anogaeth yn mynd ymlaen i addysg, cyflogaeth neu hyfforddiant ar ôl gadael yr ysgol.

Galluogi cwsmeriaid sydd wedi elwa ar lefelau uwch o gymorth i bontio'n gadarnhaol i ddarpariaeth briodol.

Cymorth Grŵp wedi'i Dargedu

Bydd cymorth grŵp wedi'i dargedu yn rhoi amser ychwanegol gyda chynghorydd gyrfa i bobl ifanc a allai fod wedi'u tangynrychioli mewn addysg, cyflogaeth a hyfforddiant.  

Byddwn yn cynnig cymorth wedi’i dargedu yn seiliedig ar nodweddion unigol:

• Cymwys i gael prydau ysgol am ddim 
• Plant sy'n derbyn gofal
• Addysg Heblaw yn yr Ysgol (Unedau Cyfeirio Disgyblion a chwricwlwm amgen)
• Mewn perygl o ddod yn unigolion nad ydynt mewn addysg, cyflogaeth na hyfforddiant (NEET)
• Gofalwyr ifanc
• Gweithredu gan yr Ysgol a Mwy
• Pobl ifanc â phresenoldeb gwael
• Saesneg ar gyfer Siaradwyr Ieithoedd Eraill
• Newydd-ddyfodiaid i'r farchnad lafur

Amcangyfrifir y bydd y grwpiau uchod yn cynrychioli 30% (tua 10,800) o'r garfan. Bydd cyfweliadau cyfarwyddyd ac anogaeth pellach yn cael eu darparu ar sail anghenion gan ddefnyddio barn broffesiynol ein cynghorwyr gyrfa.

Addysg Heblaw yn yr Ysgol

Dengys dadansoddiad o ddata hynt disgyblion bod pobl ifanc sy’n defnyddio darpariaeth Addysg Heblaw yn yr Ysgol yn fwy tebygol o ddod yn unigolion nad ydynt mewn addysg, cyflogaeth na hyfforddiant (NEET) (Haen 2 a 3). Byddwn yn darparu cymorth ychwanegol i bobl ifanc sy'n derbyn Addysg Heblaw yn yr Ysgol, gan gynnwys ymyrryd yn gynharach ym Mlwyddyn 10 a chymorth pontio yn ystod Blwyddyn 11.

Yn Cael Addysg Ddewisol yn y Cartref

Bydd cymorth cyfarwyddyd ac anogaeth yn cael ei gynnig i bob person ifanc hysbys sydd yn derbyn addysg yn y cartref:

• Byddwn yn cynnig cyfarwyddyd a chymorth anogaeth i'r holl bobl ifanc hysbys sy'n cael eu haddysgu gartref.
• Byddwn yn cyfarfod â phob awdurdod lleol i gynig ein gwasanaeth ac i drafod y dull gorau ar gyfer pob awdurdod lleol; lle bo modd, bydd hyn yn arwain at gytundeb lefel gwasanaeth.
• Gyda chefnogaeth ein Tîm Digidol a Chyfathrebu, byddwn yn darparu digwyddiadau digidol newydd ar gyfer cwsmeriaid sy’n cael addysg ddewisol yn y cartref.

Cymorth Anghenion Dysgu Ychwanegol (ADY)

Bydd y model ADY yn darparu cymorth i bobl ifanc sydd wedi symud i’r cymorth a ddarperir gan Ddeddf Anghenion Dysgu Ychwanegol a’r Tribiwnlys Addysg (Cymru) yn ogystal â’r rhai sy’n parhau o dan yr hen system anghenion addysgol arbennig (AAA).

Byddwn yn parhau i wneud y canlynol:

• Cynnig cyfarwyddyd a chymorth anogaeth diduedd
• Mynychu adolygiadau pontio ar gyfer pobl ifanc â Chynlluniau Datblygu Unigol, gan roi blaenoriaeth i bobl ifanc sy’n ymuno â’r farchnad lafur 
• Cyflwyno sesiynau grŵp
• Mynychu digwyddiadau i rieni
• Darparu cymorth gyrfaoedd a phrofiadau byd gwaith er mwyn i ysgolion ymgorffori’r cwricwlwm newydd ar draws yr ysgol
• Hwyluso gweithgareddau ymgysylltu â chyflogwyr
• Darparu cymorth i awdurdodau lleol i roi cymorth pontio ar waith
• Bydd rhyngweithiadau cychwynnol yn dechrau ar bwynt y cytunwyd arno gyda'r ysgol ar gyfer pob dysgwr unigol
• Bydd rhyngweithiadau yn digwydd mewn grŵpiau ac yn wyneb yn wyneb i gyflwyno rôl a chysyniad meddwl am y dyfodol, gwneud penderfyniadau ac ati.
• Byddwn yn anelu at fynychu adolygiad yn y flwyddyn pan fyddwn yn cyfarfod â’r person ifanc yn gyntaf i gyflwyno ein rôl i’r rieni. Os na fynychir adolygiad, cysylltir â'r rhieni.

Byddwn yn darparu cymorth parhaus, hyd at chwe blynedd o bosibl yn achos rhywun sy’n aros tan 19 os cytunir i’r cymorth ddechrau ym Mlwyddyn 9, neu bedair blynedd os bydd y cymorth yn dechrau ym Mlwyddyn 11. Gallai hyn gynnwys sesiynau grŵp, rhyngweithiadau cyfarwyddyd un-i-un, ymweliad gyda ni i ddarparwr, eiriolaeth a chyswllt ar ran cwsmeriaid yn dilyn cyfweliadau cyfarwyddyd neu adolygiadau pontio, a phresenoldeb mewn adolygiad blwyddyn olaf ar gyfer y rhai sy'n mynd i addysg, cyflogaeth neu hyfforddiant neu'r rhai sy'n dal heb benderfynu. Byddwn yn mynychu o leiaf un adolygiad yn y blynyddoedd interim.

Pobl ifanc 16-17 yn y farchnad lafur (nad ydynt mewn addysg, cyflogaeth na hyfforddiant (NEET))

Gyrfa Cymru / Cymru'n Gweithio sy'n gyfrifol am ddarparu cymorth i gwsmeriaid Haen 3 (pobl ifanc ddi-waith 16 ac 17 oed nad ydynt mewn addysg, cyflogaeth na hyfforddiant ond sydd wrthi'n ceisio cael addysg, cyflogaeth a hyfforddiant). Cynigir cymorth hefyd i’r cwsmeriaid Haen 1 hynny (pobl ifanc y mae eu lleoliad wedi dod yn anhysbys) a’r cwsmeriaid Haen 2 hynny (pobl 16 ac 17 oed ddi-waith nad ydynt ar gael ar gyfer, neu’n methu â chael mynediad i, addysg, cyflogaeth a hyfforddiant) a atgyfeiriwyd atom gan y Gwasanaeth Ieuenctid neu asiantaeth arall a enwebir gan Gydlynydd Ymgysylltiad a Chynnydd yr awdurdod lleol. Mae’r cynnig i bobl ifanc yn y farchnad lafur wedi’i anelu at eu cefnogi i wneud penderfyniadau gwybodus ac effeithiol er mwyn dod o hyd i ddysgu, hyfforddiant neu gyflogaeth briodol a bydd yn cynnwys ystod o opsiynau cymorth cyflogadwyedd, gan gynnwys:

• Bwletinau swyddi gwag
• Cymorth gyda chwilio am swydd a cheisiadau
• Eiriolaeth a chyswllt â phartneriaid perthnasol i sicrhau cyfnodau pontio llyfn
• Atgyfeirio at ddarpariaeth briodol

Bydd anogwyr cyflogadwyedd yn darparu cymorth chwilio am swydd a llunio CV, ynghyd â chymorth arall, i’r rhai 16 oed a hŷn ar y pwynt cyswllt cyntaf, naill ai yn ddigidol drwy ein gwasanaeth Cyswllt Gyrfa Cymru neu’n wyneb yn wyneb mewn canolfannau gyrfa a Chanolfannau Gwaith.

Cefnogi Pobl Ifanc mewn Sefydliadau Diogel

Bydd Gyrfa Cymru yn parhau i weithio gyda'r Bwrdd Cyfiawnder Ieuenctid a Llywodraeth Cymru i gefnogi pobl ifanc sy'n cael eu rhoi mewn sefydliadau diogel trwy wneud y canlynol:

• Eu cefnogi tra byddant mewn sefydliadau diogel i gytuno ar gynllun ar gyfer eu rhyddhau ac i sicrhau dilyniant llwyddiannus
• Cysylltu â’r person ifanc neu ei weithiwr cyfiawnder ieuenctid o fewn deg diwrnod i’r hysbysiad rhyddhau
• Cynnig cyfuniad o gymorth sy'n cynnwys sesiynau grŵp, cyfweliadau, cyfeirio, ac atgyfeirio at gyflogaeth, addysg neu hyfforddiant priodol

Dangosydd Perfformiad Allweddol

Mae 85% o’r bobl ifanc sy'n cael cymorth wedi'i dargedu yn mynd ymlaen i addysg, cyflogaeth neu hyfforddiant ar ôl gadael yr ysgol.

Codi ymwybyddiaeth cwsmeriaid o addysg, cyflogaeth a hyfforddiant a chyfleoedd eraill i wneud cynnydd.

Mae ymwybyddiaeth o gyfleoedd yn sgìl allweddol ar gyfer cynllunio gyrfa’n effeithiol ac mae'n nodwedd o gyfweliadau cyfarwyddyd ac anogaeth un-i-un, sesiynau grŵp, a digwyddiadau i gyflogwyr.

Mae llawer o'r datblygiadau digidol a chyfathrebu a amlinellir o dan Ganlyniad Strategol 1 wedi'u cynllunio i godi ymwybyddiaeth cwsmeriaid o addysg, cyflogaeth a hyfforddiant a chyfleoedd dilyniant eraill.

Byddwn yn cynnal ymchwil defnyddwyr gyda chynghorwyr gyrfa i ddeall yn well y berthynas rhwng ein hadnoddau gwybodaeth am y farchnad lafur a'r defnydd o’r wybodaeth honno mewn cyfweliadau cyfarwyddyd i wella profiad cwsmeriaid.

Dangosydd Perfformiad Allweddol

Dywedodd 90% o’r bobl ifanc mewn addysg eu bod yn fwy ymwybodol o gyfleoedd.

Gwella mynediad at fanteision cymorth cyfarwyddyd ac anogaeth gyrfaoedd drwy gydweithredu ac ymgysylltu â phartneriaid a dylanwadwyr. 

Cytundebau Partneriaeth

Byddwn yn negodi cytundeb partneriaeth gyda phob ysgol brif ffrwd ac arbennig yn ogystal ag Unedau Cyfeirio Disgyblion (nid yw Unedau Cyfeirio Disgyblion na cholegau addysg bellach yn cael eu cyfrif yn y dangosydd perfformiad allweddol).

Gweithio gyda Rhieni/Gofalwyr

Byddwn yn parhau i ddatblygu ein strategaeth rhieni i gyflawni ein pedwar nod:

• Ymgysylltu â rhieni yn gynharach ym mywyd academaidd eu plentyn
• Ymgysylltu â rhieni mewn grwpiau targed fel y nodir yn Dyfodol Disglair
• Gwella ein cyrhaeddiad i BOB rhiant, yn enwedig trwy ddulliau digidol
• Cynnwys rhieni’n well wrth ddylanwadu ar ddatblygiad ein gwasanaethau a’u llywio

Byddwn yn cyflawni hyn drwy’r dulliau canlynol:

• Mynychu nosweithiau rhieni wedi'u targedu mewn ysgolion
• Cysylltu â rhieni pobl ifanc yn y grwpiau targed i fynd ar drywydd camau gweithredu
• Ymgysylltu â rhieni trwy grwpiau cymunedol trwy ein presenoldeb ar y cyfryngau cymdeithasol
• Datblygu deunydd cyfathrebu y gellir ei rannu gyda llywodraethwyr ysgol
• Cynnal ymchwil a gwerthuso defnyddwyr ar yr adran rhieni o’r wefan er mwyn parhau i ddatblygu ein hadran rhieni ar y wefan
• Datblygu cylchlythyr rhieni'r ysgol
• Mynychu adolygiadau trosiannol
• Treialu’r gwaith o ddarparu noson/digwyddiad rhanbarthol a rhithwir i rieni gan Gyrfa Cymru

Dangosydd Perfformiad Allweddol

Cytundebau partneriaeth gyda 100% o sefydliadau partner sy'n galluogi gwell mynediad at fanteision cyfarwyddyd ac anogaeth gyrfaoedd.

Hysbysu ac ysgogi pobl ifanc ynglŷn â’r byd gwaith drwy ymgysylltu â chyflogwyr a modelau rôl.

Ysgolion Cynradd – Cyflwyniad i Yrfaoedd a Phrofiadau Byd Gwaith

Fel rhan o gontract Syniadau Mawr Cymru, bydd her menter yn cael ei chyflwyno mewn ysgolion cynradd drwy Cazbah, ein partneriaid dan gontract. Bydd hyn yn cael ei gynnig i bob ysgol gynradd ac mae’n cynnwys hyrwyddo a marchnata’r her, cyflwyno pum sesiwn dysgu proffesiynol ranbarthol i athrawon, a chyfres o bum digwyddiad arddangos rhanbarthol. Mae’r digwyddiadau arddangos ar gyfer ysgolion sy’n cymryd rhan i rannu eu profiadau, arddangos eu prosiectau, gwerthu eu cynhyrchion, a chymryd rhan mewn profiadau dysgu a arweinir gan fusnes.

Ysgolion Uwchradd

Byddwn yn cynnig cymorth ymgysylltu â chyflogwyr wedi’i deilwra i ysgolion prif ffrwd gyda’r nod o hysbysu, ysbrydoli ac ysgogi dysgwyr am gyfleoedd gyrfa ac wreiddio gyrfaoedd a phrofiadau byd gwaith yn y cwricwlwm drwy weithgarwch a arweinir gan gyflogwyr. Bydd y gefnogaeth yn seiliedig ar anghenion yr ysgol a'i gofynion cwricwlwm penodol.

Byddwn yn anelu at ddarparu pum digwyddiad cyflogwyr unigol ar gyfartaledd fesul ysgol (cyflwyniadau, ymweliadau, mewnbwn cwricwlwm penodol ac ati) ac o leiaf un digwyddiad amlgyflogwr fesul ysgol (diwrnodau carwsél / byd gwaith, rhwydweithio cyflym ac ati). Bydd hyn yn cael ei gynnig fel rhan o ddull dewislen. Bydd y gwaith hwn yn cael ei flaenoriaethu ym mlynyddoedd 7-11 a gall gynnwys cymysgedd o gyflwyno wyneb yn wyneb a digidol.

Byddwn yn parhau i gynnig mynediad i ysgolion i gronfa ddata'r Gyfnewidfa Addysg Busnes, sy'n eu galluogi i chwilio am gyflogwyr lleol.  Byddwn yn adolygu’r Gyfnewidfa Addysg Busnes yn ystod y flwyddyn ac yn cynnal ail-lansiad ‘meddal’ gyda marchnata wedi’i dargedu.

Byddwn yn parhau i gynnal digwyddiad Cymraeg yn y Gweithle cenedlaethol ar raddfa fawr gyda’r nod o amlygu gwerth y Gymraeg yn y farchnad lafur a’r amrywiaeth o swyddi sydd ar gael. ³

Er mwyn parhau i symud ymgysylltu â chyflogwyr y tu hwnt i ddull traddodiadol, annibynnol, rydym yn bwriadu datblygu cyfres o heriau sy’n ymwneud â’r cwricwlwm.  Bydd yr heriau hyn yn brosiectau datblygu sy’n cynnwys cyflogwr mawr o bob un o naw sector buddsoddi allweddol (Saseng yn unig), Llywodraeth Cymru, y corff sector/diwydiant perthnasol, ac athro sy’n gallu cyfleu negeseuon allweddol o’r sector wrth gyflwyno’r cwricwlwm drwy’r Maes Dysgu a Phrofiad mwyaf perthnasol. Wrth wneud hynny, y nod yw llunio glasbrint ar gyfer datblygu mewnbwn sy’n benodol i’r cwricwlwm, gan ddefnyddio dull cydweithredol sy’n diwallu anghenion ysgolion a chyflogwyr, a chreu cronfa o adnoddau her y gellir eu hatgynhyrchu neu eu diwygio.  Wrth i'r heriau gael eu datblygu yn ystod y flwyddyn fusnes, byddwn yn gofyn i bob cynghorydd cyswllt busnes i gyflwyno o leiaf un her yr un yn un o'u hysgolion dynodedig.

Byddwn yn cefnogi’r fenter ‘heriau’ newydd drwy ddatblygu is-frand newydd a chreu amrywiaeth o asedau, cynnwys ac adnoddau. Bydd y fenter newydd yn cael ei hyrwyddo a'i chyfleu i bob cynulleidfa allweddol.

Byddwn yn parhau i gefnogi'r Fenter Partneriaid Gwerthfawr mewn ysgolion. Mae'r fenter hon yn ceisio ffurfioli perthnasoedd rhwng ysgolion a chyflogwyr lleol allweddol. Yn unol â'r ymdrech i ddatblygu dulliau mwy arloesol o ymgysylltu â chyflogwyr sy'n seiliedig ar y cwricwlwm, bydd cynghorwyr cyswllt busnes yn cael y dasg o gynhyrchu un astudiaeth achos yr un i gefnogi rhannu arfer gorau (27 i gyd).

Byddwn yn anelu at ddefnyddio’r Fenter Partneriaid Gwerthfawr i ddatblygu gwaith cydfuddiannol arall rhwng ysgolion a chyflogwyr, yn fwyaf nodedig cyfarfodydd ag athrawon. Byddwn yn rhoi rhestr o gyfarfodydd ag athrawon ‘cymeradwy’ i gynghorwyr cyswllt busnes, fel y gwelwyd mewn prosiect ymchwil diweddar a gomisiynwyd gan Lywodraeth Cymru, ac yn gofyn iddynt ddefnyddio’r Fenter Partneriaid Gwerthfawr i hwyluso’r cyfarfodydd hyn, lle bo modd.

Byddwn yn parhau i gynnig cymorth i ysgolion i ddatblygu cymunedau cyn-fyfyrwyr ac yn defnyddio cyn-fyfyrwyr fel cyflogwyr i gefnogi gwaith ymgysylltu â busnes mewn ysgolion.

Fel rhan o’r rhaglen Profiad Gwaith wedi’i Deilwra, byddwn yn lleoli 250 o ddysgwyr cymwys o ysgolion â blaenoriaeth ar draws pum clwstwr yng Nghymru. Bydd yr ysgolion yn cael eu hadnabod gan ddefnyddio data ar brydau ysgol am ddim a phresenoldeb, a ddarparwyd gan Lywodraeth Cymru.

Y clystyrau fydd:

• Abertawe a Sir Gaerfyrddin
• Castell-nedd Port Talbot, Rhondda Cynon Taf a Blaenau Gwent
• Merthyr, Torfaen a Phowys
• Casnewydd a Chaerdydd
• Ynys Môn, Conwy a Gwynedd

Byddwn yn parhau i ddarparu gweithgareddau i hyrwyddo entrepreneuriaeth fel rhan o gontract Syniadau Mawr Cymru. Bydd ein tîm o gynghorwyr entrepreneuriaeth yn defnyddio rhwydwaith o fodelau rôl entrepreneur i gyflwyno 1,000 o weithdai mewn ysgolion uwchradd ledled Cymru. Nod y sesiynau hyn yw hysbysu ac ysgogi dysgwyr i ystyried hunangyflogaeth a dechrau busnes.

Ysgolion Arbennig / Unedau Cyfeirio Disgyblion

Gan gydnabod anghenion amrywiol ysgolion arbennig ac Unedau Cyfeirio Disgyblion, byddwn yn parhau i gynnig gwasanaeth ymgysylltu â chyflogwyr pwrpasol i’r lleoliadau hyn.  Yn seiliedig ar ddata o flynyddoedd blaenorol, ein nod yw darparu 160 o weithgareddau ar draws 80 o leoliadau.

Byddwn yn parhau i gynnal pedair ffair yrfaoedd ‘Beth Nesaf’ ranbarthol ar raddfa fawr ar gyfer dysgwyr ADY.  Byddwn yn adolygu fformat y digwyddiadau hyn yn ystod y flwyddyn i sicrhau eu bod yn canolbwyntio ar anghenion datblygu gyrfa'r dysgwyr hyn.

Cefnogaeth i Gyflogwyr

Byddwn yn cynnal seremoni wobrwyo Partneriaid Gwerthfawr i ddathlu cyfraniad cyflogwyr a chodi proffil y gwaith y mae cyflogwyr yn ei wneud gydag ysgolion a phobl ifanc.

Byddwn yn archwilio’r potensial i ddatblygu set o safonau cyflogwyr cytûn yng Nghymru i helpu cyflogwyr i wneud y mwyaf o’u gallu i wella’r ddarpariaeth o yrfaoedd a phrofiadau byd gwaith yn effeithiol mewn ysgolion. Mae hyn yn debygol o fod ar ffurf datblygu peilot gyda grŵp o gyflogwyr dylanwadol, wedi'i gefnogi gan gyfleoedd datblygiad proffesiynol parhaus i’w hyrwyddo a lledaenu’r gair.

Digidol a Chyfathrebu

Byddwn yn rhyddhau’r datblygiad partneriaeth newydd gyda Croeso Cymru o fewn CrefftGyrfaoedd, sy’n cefnogi pobl ifanc i ddysgu mwy am y sector lletygarwch a thwristiaeth a phrentisiaethau fel opsiwn. Byddwn yn ymchwilio i gyfleoedd ar gyfer datblygiadau pellach gyda phartneriaid eraill.

Dangosydd Perfformiad Allweddol

Mae Gyrfa Cymru yn hwyluso o leiaf un digwyddiad ymgysylltu â chyflogwyr mewn 95% o ysgolion uwchradd Cymru.

³ Mae’n bwysig nodi na fyddwn yn cynnal digwyddiadau ‘Dewis Eich Dyfodol’ ar raddfa fawr yn ystod 2024 i 2025. Nododd arolwg o ysgolion yn ystod 2023 i 2024 ei bod yn anoddach i ysgolion gael mynediad i’r digwyddiadau hyn oherwydd costau cludiant, pwysau cwricwlwm a staff cyflenwi, ac mae hyn yn amlwg yn y ffigurau presenoldeb mewn sawl digwyddiad. Cefnogir y penderfyniad hwn hefyd gan yr awydd i ganolbwyntio mwy ar ymgysylltu pwrpasol sydd wedi’i ymgorffori yn y cwricwlwm yn hytrach na digwyddiadau unigol.

Codi ymwybyddiaeth pobl ifanc o’r sgiliau sydd eu hangen ar sectorau sy’n flaenoriaeth economaidd a sut y maent yn cysylltu â’r cwricwlwm.

Mae'r camau gweithredu a nodir o dan Ganlyniad Strategol 5 hefyd yn berthnasol i Ganlyniad Strategol 6.

Gwella gallu ysgolion ac arweinwyr gyrfaoedd i ddarparu gyrfaoedd a phrofiadau byd gwaith o fewn y Cwricwlwm i Gymru.

Bydd ein cydlynwyr gyrfaoedd a phrofiadau byd gwaith yn parhau i gynnig gwasanaeth ymgynghori a hyfforddi pwrpasol i ysgolion uwchradd, ysgolion arbennig, Unedau Cyfeirio Disgyblion a sefydliadau addysg bellach sy’n ymgysylltu â tharged o 1,700 o athrawon. Bydd ein ffocws yn bennaf ar yr ysgolion hynny sy'n gweithio tuag at Wobr Ansawdd Gyrfa Cymru, er y byddwn yn cynnig gwasanaeth ymgynghorol pwrpasol i ysgolion uwchradd ac arbennig ar sail cais.

Bydd ein cynnig i ysgolion cynradd yn cynnwys atgyfeiriad at adnoddau ar-lein a’n cynnig dysgu proffesiynol isod.

Byddwn yn cyflwyno rhaglen o ddysgu proffesiynol ar-lein i ysgolion a lleoliadau ledled Cymru. Bydd calendr o gyfleoedd dysgu proffesiynol ar gyfer 2024 i 2025 yn cael ei gynnig i ysgolion, ochr yn ochr â system ymgeisio neu fynegi diddordeb i recriwtio athrawon ar gyfer pob sesiwn neu gwrs hyfforddi.  Bydd y sesiynau arfaethedig yn cefnogi ysgolion sy'n gweithio tuag at Wobr Ansawdd Gyrfa Cymru ac yn rhoi cymorth ymarferol i ysgolion eraill i ddatblygu eu cwricwlwm gyrfaoedd a phrofiadau byd gwaith.

Bydd pynciau ar gyfer sesiynau dysgu proffesiynol byw ar-lein yn cynnwys:

• Datblygu polisi gyrfaoedd a phrofiadau byd gwaith
• Cynllunio, adolygu a gwerthuso gyrfaoedd a phrofiadau byd gwaith yn y cwricwlwm
• Archwilio gyrfaoedd a phrofiadau byd gwaith yn y cwricwlwm
• Gwreiddio gyrfaoedd a phrofiadau byd gwaith mewn Meysydd Dysgu a Phrofiad – trafodaethau proffesiynol i athrawon (uwchradd yn unig)
• Menter ac entrepreneuriaeth
• Defnyddio gwefan ac adnoddau Gyrfa Cymru (ysgolion cynradd)
• Defnyddio gwefan ac adnoddau Gyrfa Cymru (ysgolion uwchradd)
• Defnyddio gwefan ac adnoddau Gyrfa Cymru (ysgolion arbennig)
• Dinas Gyrfaoedd

Bydd cyrsiau ar-lein yn cynnwys y canlynol:

Cymhwyster Arweinydd Gyrfa sydd wedi’i achredu gan yr OCR (Lefel 6), wedi'i gymeradwyo gan yr Academi Genedlaethol ar gyfer Arweinyddiaeth Addysgol (NAEL), ac wedi'i gyflwyno i garfan o tua 15 o athrawon yn ystod 2024 i 2025

• Gyrfaoedd yn Eich Cwricwlwm (ysgolion cynradd)
• Gyrfaoedd yn Eich Cwricwlwm (ysgolion uwchradd ac arbennig)

Byddwn yn parhau i ddatblygu adnoddau sy'n cefnogi ysgolion i gyflwyno gyrfaoedd a phrofiadau byd gwaith. I ategu’r calendr o gyfleoedd dysgu proffesiynol, byddwn yn parhau i ddarparu ystod o adnoddau dysgu anghydamserol, megis rhestrau chwarae a fideos, i gefnogi athrawon i gyflwyno gyrfaoedd a phrofiadau byd gwaith yn y Cwricwlwm i Gymru.

Mae adnoddau newydd i’w cynhyrchu yn cynnwys y canlynol:

• Sut i sefydlu hyrwyddwyr gyrfa yn eich ysgol
• Gwireddu gyrfaoedd a phrofiadau byd gwaith yn y cwricwlwm
• CrefftGyrfaoedd

Bydd yr adnoddau hyn yn cael eu cadw ar Hwb, a chyfeirir athrawon unigol at adnoddau penodol wrth i anghenion hyfforddi gael eu nodi.

Byddwn yn parhau i dreialu Gwobr Ansawdd Gyrfa Cymru, sydd newydd ei chyflwyno. Bydd ffocws 2024 i 2025 ar fynd ag ysgolion ymlaen i Gam 2 Gwobr Ansawdd Gyrfa Cymru gyda dyddiad cwblhau targed o fis Gorffennaf 2025. Bydd chwe ysgol ychwanegol yn dechrau Cam 1 y dyfarniad yn 2024.  Bydd hyn yn sicrhau rhaglen dreigl o ymgeiswyr newydd ar gyfer y wobr.

Dangosydd Perfformiad Allweddol

Darperir hyfforddiant neu gymorth ymgynghorol i wella rhaglenni Addysg Gyrfaoedd a Phrofiadau sy'n Gysylltiedig â Byd Gwaith i athrawon mewn 70% o ysgolion uwchradd Cymru.

Darparu gwasanaethau wedi’u teilwra sy’n canolbwyntio ar y cwsmer, sydd wedi’u gwella gan dechnoleg, ac sy’n ymatebol i anghenion defnyddwyr ac yn hygyrch i bawb.

Yn 2024 i 2025, byddwn yn gwneud y canlynol:

• Gwella mynediad cyfrifiadurol yn ein canolfannau ar gyfer gwesteion / cwsmeriaid / allgymorth / digwyddiadau gan ddefnyddio Windows 11.
• Darparu cyfleuster hunanwasanaeth ar wefan Gyrfa Cymru i gwsmeriaid drefnu eu hapwyntiadau eu hunain gyda chynghorydd gyrfa (ar gael ar gyfer cwsmeriaid Cymru’n Gweithio ym mis Mai 2024 a chwsmeriaid addysg bellach ym mis Medi 2024).
• Archwilio'r posibiliadau sydd ar gael ar gyfer personoli ac addasu’r wefan ymhellach trwy Systemau Rheoli Cynnwys amgen sydd heb ben.
• Adolygu cyflwyniad ehangach WhatsApp fel sianel ar gyfer Cyswllt a mireinio nodweddion canolfan gyswllt A365 i sicrhau profiad cwsmer o ansawdd da.
• Datblygu strategaeth brawf ar gyfer awtomeiddio profion ar ein cynhyrchion ar y wefan nad ydynt at ddefnydd y cyhoedd, er mwyn creu proses fwy effeithlon a gwella cysondeb cynhyrchion, yn ogystal â gwella profiad y cwsmer.
• Defnyddio canfyddiadau’r archwiliad optimeiddio peiriannau chwilio i gyflwyno cynllun gweithredu o argymhellion a fydd yn gwella cynnwys a phresenoldeb ein gwefan.
• Cynnal sgan hygyrchedd ar draws y wefan gyfan, gan ddatblygu a gweithredu cynllun gweithredu yn ôl yr angen.
• Dablygu ymhellach ein gwaith ar bersonâu gwefannau, teithiau defnyddwyr a mapio teithiau er mwyn alinio ein gwasanaethau ymhellach ag anghenion ac ymddygiad cwsmeriaid.
• Parhau i ddatblygu proffil y cwsmer ar y wefan trwy integreiddio datblygiadau i gymwysiadau / cyfnodau perthnasol ar y map trywydd.

Dangosydd Perfformiad Allweddol

Mae 85% o gwsmeriaid yn dweud bod ein gwasanaeth Cyswllt Gyrfa Cymru yn diwallu eu hanghenion.

Creu gweithlu Gyrfa Cymru sy’n fedrus iawn, ymgysylltiol, amrywiol ac ystwyth.

Yn 2024 i 2025, byddwn yn gwneud y canlynol:

• Archwilio gweithgareddau a sianeli presennol, gan geisio barn gweithwyr a rhoi cynnig / argymhelliad at ei gilydd ar gyfer gwell cyfathrebu mewnol a chynnig ymgysylltu.
• Parhau â’n cynllun cyfathrebu newid o amgylch gostyngiadau yn y gyllideb, gan arwain at gyfathrebu ynghylch strategaeth newydd y cwmni o 2025 ymlaen fel bod cyflogeion yn cael eu hysbysu ac yn gallu bwydo i mewn i nodau tymor hwy.
• Cyflwyno ac ymgorffori canllawiau brand cwmni newydd fel bod eglurder i weithwyr ar ein brand a hunaniaeth weledol.

Canolbwyntio gweithgareddau dysgu a datblygu ar y canlynol:

• Parhau i ddarparu “hanfodion gwych” sy'n galluogi gweithwyr newydd i ddod yn gynhyrchiol o fewn yr amser lleiaf posibl, sy’n sicrhau bod pob gweithiwr yn cydymffurfio â deddfwriaeth a chanllawiau cyfreithiol, ac sy’n sicrhau bod pob gweithiwr yn meddu ar y sgiliau, ymddygiadau a gwybodaeth graidd sydd eu hangen ar gyfer eu rolau
• Datblygu sgiliau ein rheolwyr, fel y gallant arwain diwylliant sy'n canolbwyntio ar ganlyniadau, sy'n hyrwyddo cydweithredu ar draws timau hybrid, sy’n ymgysylltu â gweithwyr, sy’n cefnogi lles gweithwyr, ac sy’n gallu ymdopi'n dda â newid cyflym
• Datblygu’r sgiliau a galluoedd digidol i fanteisio ar dechnoleg newydd, gan ei harneisio i wella prosesau busnes mewnol, ymgysylltu â’n cwsmeriaid, a darparu gwasanaethau wedi’u galluogi gan dechnoleg
• Datblygu sgiliau meddal ein holl weithwyr, gan eu galluogi i fod yn wydn ac yn ystwyth mewn gweithle sy’n newid yn gyflym
• Datblygu gwybodaeth, ymddygiad a sgiliau cydweithwyr fel eu bod yn gallu darparu gwasanaethau o ansawdd uchel yn seiliedig ar fewnwelediadau cyfredol a sicrhau bod Gyrfa Cymru yn sefydliad partner y gellir ymddiried ynddo
• Parhau i ddatblygu ein sgiliau Cymraeg fel sefydliad dwyieithog

Dangosydd Perfformiad Allweddol

Mae 100% o gynghorwyr gyrfaoedd dan hyfforddiant yn cwblhau eu Diploma Lefel 6 mewn Cyfarwyddyd a Datblygu Gyrfaoedd yn llwyddiannus o fewn y ddwy flynedd a neilltuwyd.

Mae 75% o weithwyr yn adrodd lefelau cadarnhaol o ymgysylltu â’r cwmni.

Gwneud y defnydd gorau o dechnoleg i drawsnewid ein ffyrdd o weithio a datblygu sgiliau a galluoedd digidol holl weithwyr Gyrfa Cymru.

Yn 2024 i 2025, byddwn yn gwneud y canlynol:

• Cynyddu awtomeiddio mewn ystod o brosesau seilwaith sydd angen ymyrraeth â llaw ar hyn o bryd, ee cynnal sesiynau cynefino/ymadael gyda staff, lleoli cyfarpar, ansawdd data, lanlwytho diogel gan drydydd partïon.
• Diogelu'r dyfodol trwy ddadgomisiynu canolfan ddata ar y safle a mudo gwasanaethau i'r cwmwl.  Bydd hyn yn lleihau'r gofyniad cyfalaf i adnewyddu caledwedd ar ddiwedd ei chylchred cymorth, cynnig gwell hyblygrwydd o amgylch adeiladau Gyrfa Cymru, lleihau costau cyfleustodau, a chaniatáu ar gyfer graddio adnoddau trwy fodel sy'n seiliedig ar ddefnydd.
• Gwella’r broses o lywio adnoddau dwyieithog presennol.
• Darparu cynnwys rheolaidd ar nodweddion Microsoft newydd, gan ddefnyddio deallusrwydd artificial / sgwrsfot o bosibl i gynyddu ceisiadau cymorth yn ymwneud ag ymarferoldeb neu ‘sut i’ i gefnogi gwelliant parhaus mewn sgiliau digidol ar draws y cwmni.
• Sefydlu gweithgor deallusrwydd artifisial sydd â'r dasg o nodi pedwar prosiect sy'n ymwneud â deallusrwydd artiffisial (dau wedi'u hanelu at gwsmeriaid a dau wedi'u hanelu at weithwyr) y gallwn fwrw ymlaen â hwy o 2024-25 ymlaen. Bydd prosiectau'n gwella profiadau cwsmeriaid ac yn galluogi gweithwyr i weithio'n fwy effeithlon.
• Adolygu cysylltedd ar draws lleoliadau darparu i nodi problemau ac unrhyw welliannau y mae angen eu gwneud.
• Cynnal adolygiad annibynnol o saernïaeth ein gwefan i sicrhau bod gennym system gadarn, effeithlon ond hyblyg gyda phrosesau ategol ar waith a rhoi argymhellion ar waith yn unol â hynny.
• Parhau i fwrw ymlaen â chanlyniadau’r Arolwg Sgiliau Digidol a gwblhawyd gan yr holl weithwyr yn ail flwyddyn Dyfodol Disglair a datblygu sgiliau a galluoedd digidol gweithwyr i fanteisio ar dechnoleg newydd.

Dangosydd Perfformiad Allweddol

Gwelliant yn sgiliau a galluoedd digidol gweithwyr Gyrfa Cymru.

Llywio ein datblygiadau o ran strategaeth, polisi a gwasanaethau drwy fewnwelediad cwsmeriaid, gwybodaeth fusnes, data a gwaith dadansoddeg.

Yn 2024 i 2025, byddwn yn gwneud y canlynol:

• Sefydlu grŵp gorchwyl a gorffen i ddiffinio gofynion a chwmpasu'r adnoddau a'r amserlenni ar gyfer dod â data gwefan fesul cam o fewn system Rheoli Cysylltiadau Cwsmeriaid. Byddwn yn gwerthuso ar bob cam a gwneud cynnydd o fewn gofynion GDPR.
• Adolygu a gwerthuso prosesau a safonau dadansoddi data cyfredol ar draws y cwmni, gan gynnwys pensaernïaeth y warws data, datblygu ‘geiriadur data’, adolygu prosesau busnes, a chynyddu ymwybyddiaeth o ffocws adroddiadau presennol.
• Cynyddu ein gweithgarwch cysylltiadau â’r cyfryngau a materion cyhoeddus yn gyffredinol, ac yn arbennig drwy ddefnydd cynyddol o astudiaethau achos, mwy o straeon lleol/rhanbarthol, a chynnwys wedi’i ysgogi gan gysylltiadau cyhoeddus ar ddatblygiadau digidol allweddol megis lansio partneriaeth CrefftGyrfaoedd gyda Croeso Cymru.
• Monitro’r effaith ar ein gwaith ymgysylltu ar y cyfryngau cymdeithasol wrth i ni leihau gweithgareddau fel digwyddiadau sy’n cynhyrchu lefelau uchel o ymgysylltu, a chymryd camau yn unol â hynny.
• Cynhyrchu adroddiad metrigau gwe blynyddol a monitro'r effaith ar ddefnydd ar y we o offer allweddol megis y Cwis Paru Gyrfa a'r Cwis Buzz pan na fyddant bellach yn cael eu cyflwyno trwy sesiynau grŵp mewn ysgolion o fis Medi ymlaen, gan wneud argymhellion yn unol â hynny.
• Cynnal gweithgareddau ymchwil defnyddwyr ar draws y cwmni i gefnogi meysydd newydd o ddarpariaeth gwasanaeth, deall effaith gostyngiadau mewn darpariaeth gwasanaethau, a’n helpu i gynllunio ar gyfer strategaeth nesaf Gyrfa Cymru.