Cofnodion Bwrdd CCDG 13 Rhagfyr 2023

Mae Bwrdd Career Choices Dewis Gyrfa (CCDG) yn cyfarfod bob chwarter. Mae'r Bwrdd yn gyfrifol am lywodraethu a chydymffurfio â'r cod Llywodraethu corfforaethol. Isod mae cofnodion cyfarfod Bwrdd CCDG a gynhaliwyd ar 13 Rhagfyr 2023.

Aelodau'r Bwrdd yn bresennol:

• Aled Jones-Griffith
• Andrew Clark
• Dave Mathews
• Erica Cassin (Cadeirydd)
• Helen White
• James Harvey
• Joni Ayn-Alexander
• Kate Daubney
• Neil Coughlan
• Toni McLelland
• Tony Smith
• Richard Thomas

Llywodraeth Cymru:

Sinead Gallagher

Yn cynrychioli Gyrfa Cymru:

• Nerys Bourne
• Nikki Lawrence
• Ruth Ryder

Cyfranogwyr:

Simon Pirotte, Comisiwn Addysg Drydyddol ac Ymchwil Cymru

Yn absennol:

• Sam Evans
• Dave Hagendyk

1. Datganiadau o fuddiant

Ni nodwyd unrhyw ddatganiadau.

2. Cofnodion y cyfarfod blaenorol, 6 Gorffennaf 2023

Cymeradwywyd cofnodion y cyfarfod blaenorol fel cofnod cywir.

3. Materion yn codi

3.1 Adroddiad y Prif Weithredwr – Naratif Dangosydd Perfformiad Allweddol (Cofnod 3.3)

Roedd ffigyrau o flwyddyn i flwyddyn bellach wedi'u cynnwys yn yr adroddiad felly caewyd y cam gweithredu.

3.2 Adroddiad Diogelu (Cofnod 3.4)

Roedd adroddiad wedi’i gyflwyno i Bwyllgor Perfformiad ac Effaith y Bwrdd felly caewyd y cam gweithredu.

3.3 Adroddiad y Prif Weithredwr – Ymestyn Gwahoddiad i’r Pwyllgor Cyllid, Archwilio a Risg (Cofnod 5)

Roedd yr holl aelodau wedi'u gwahodd i eitem gyntaf y Pwyllgor Cyllid, Archwilio a Risg. Caewyd y cam gweithredu felly.

3.4 Gwerthusiad/Elw ar Fuddsoddiad – Rhestr Termau (Cofnod 7)

Caewyd y cam gweithredu gan fod rhestr termau’r cwmni wedi'i dosbarthu.

3.5 Adolygu Strwythur y Pwyllgorau (Cofnod 10)

Roedd cadeiryddion is-bwyllgorau'n parhau i adolygu'r cylch gorchwyl felly cariwyd yr eitem drosodd i'r cyfarfod nesaf. Yna byddai cyfarfod gyda Chadeirydd y Bwrdd, y Prif Weithredwr a chadeiryddion yr is-bwyllgorau yn cael ei drefnu.

Cam gweithredu1: Cadeiryddion yr is-bwyllgorau i gwblhau'r cylch gorchwyl drafft.

Cam gweithredu 2: Cyfarfod i'w drefnu i drafod y cylch gorchwyl diwygiedig.

3.6 Adborth o Gyfarfod y Bwrdd (Cofnod 13.1)

Byddai'r eitem ynghylch defnyddio technoleg ryngweithiol ar gyfer cyfarfodydd rhithwir yn cael ei chario drosodd i'r cyfarfod nesaf.

Cam gweithredu 3: Cadeirydd i adolygu technoleg ryngweithiol i gefnogi trafodaethau bwrdd.

3.7 Cyfieithu ar y Pryd ar gyfer Microsoft Teams (Cofnod 13.2

Nodwyd y byddai Microsoft Teams yn cefnogi cyfieithu ar y pryd ac y gellid ei ddefnyddio ar gyfer y cyfarfod rhithwir nesaf.

4. Y newyddion diweddaraf gan y cadeirydd – llafar

4.1 Trafodaethau ar y Gyllideb

Rhoddodd y Cadeirydd ddiweddariad i'r aelodau ar sawl cyfarfod a gynhaliwyd gyda Llywodraeth Cymru. Trafodwyd natur anochel toriadau ariannol i gyllideb Gyrfa Cymru, ond roedd gwerth Gyrfa Cymru i bobl ifanc a’r economi wedi’i nodi drwy’r trafodaethau hyn, yn ogystal â’i chyfraniad at bolisïau allweddol a chyhoeddiadau diweddar.

4.2 Adolygiadau Perfformiad Aelodau'r Bwrdd

Nodwyd bod yr adolygiadau bron wedi'u cwblhau gyda nifer fach eto i’w cwblhau.

4.3 Recriwtio i’r Bwrdd

Dywedodd y Cadeirydd fod yr ymgyrch recriwtio ar gyfer aelodau bwrdd newydd bellach yn fyw. Roedd dull newydd yn cael ei fabwysiadu i ddenu ystod mor amrywiol o geisiadau â phosibl.

Gofynnwyd i'r aelodau rannu ar draws eu rhwydweithiau.

Cam gweithredu 4: Holl aelodau'r Bwrdd i hyrwyddo'r cyfleoedd recriwtio ar gyfer aelodau newydd.

5. Adroddiad y prif weithredwr

Trafododd yr aelodau yr adroddiad a ddosbarthwyd yn flaenorol gyda rhai eitemau'n cael eu hamlygu.

5.1 Risgiau Allweddol i'r Cwmni

Nododd yr aelodau'r prif risgiau i'r cwmni. Dywedodd y Prif Weithredwr fod geiriad y risg yn ymwneud â sefyllfa ariannol y cwmni a’r effaith bosibl yn cael ei ddiweddaru ar sail dreigl.

5.2 Codiad Cyflog 2023/24

Nododd yr aelodau y cytunwyd ar y codiad cyflog ar gyfer y flwyddyn gyfredol. Nodwyd bod y codiad a roddwyd yn debyg ond nid yn union yr un fath â'r un a roddwyd gan Lywodraeth Cymru. Trafodwyd risg ynghylch y sefyllfa hon dros y blynyddoedd i ddod yn erbyn hinsawdd ariannol heriol.

5.3 Cyfarfod Holl Staff

Nododd yr aelodau fod cyfarfod i’r holl staff wedi'i gynnal i egluro gohirio'r sesiynau cynllunio busnes blynyddol.

5.4 Cynnydd Sero Net

Nododd yr aelodau y cynnydd a’r cynlluniau i wella sefyllfa’r cwmni. Rhybuddiodd yr aelodau, o ystyried y sefyllfa ariannol debygol, y byddai camau gweithredu yn y cynllun sero net yn cael eu hadolygu i sicrhau fforddiadwyedd.

Cam gweithredu 5: Cynllun gweithredu sero net i'w adolygu yn erbyn blaenoriaethau eraill y cwmni o ystyried yr hinsawdd ariannol heriol.

6. Diweddariad Llywodraeth Cymru

6.1 Sefyllfa'r Gyllideb

Clywodd yr aelodau fod dyraniadau cyllideb trosfwaol y Prif Grwpiau Gwariant wedi’u pennu ond bod penderfyniadau i’w gwneud o hyd yn y Prif Grwpiau Gwariant unigol. Nodwyd bod cyllideb Gyrfa Cymru wedi'i chyfuno â'r holl weithgarwch cyflogadwyedd. Cydnabuwyd yr her sy'n wynebu'r cwmni.

Diolchwyd i'r weithrediaeth a'r tîm uwch-reolwyr am eu hymgysylltiad a'u hymatebolrwydd gyda cheisiadau byr rybudd am ragor o wybodaeth.

Y brif neges i'r Bwrdd oedd mai senario tymor hwy oedd yr her ar draws y sector cyhoeddus cyfan. Dylid canolbwyntio felly ar y defnydd mwyaf effeithlon o adnoddau a fydd yn cael yr effaith fwyaf a sicrhau aliniad â’r cenhadaeth graidd.

6.2 Datganiad o Flaenoriaethau’r Comisiwn Addysg Drydyddol ac Ymchwil

Nodwyd bod cyhoeddi'r datganiad wedi'i ohirio tan y flwyddyn newydd.

6.3 Lansio Cenhadaeth Economaidd

Nodwyd y lansiad, a chytunwyd y byddai diweddariad ar weithrediad y cynllun gweithredu yn dod gerbron y cyfarfod nesaf.

Cam gweithredu 6: Y newyddion diweddaraf ar gynllun gweithredu’r genhadaeth economaidd i ddod gerbron y Bwrdd nesaf.

7. Comisiwn addysg drydyddol ac ymchwil cymru

Ymunodd Prif Swyddog Gweithredol y comisiwn newydd â chyfarfod y Bwrdd. Cafodd yr aelodau yr wybodaeth ddiweddaraf am ffocws presennol gwaith y comisiwn.  Adnabuwyd mai sicrhau cyfnod pontio esmwyth o’r trefniadau presennol a gosod y sylfeini ar gyfer gwaith y comisiwn oedd y blaenoriaethau cychwynnol.

Amlygwyd yr aliniad amlwg rhwng y comisiwn a gwaith Gyrfa Cymru, ynghyd â ffocws ar weithio mewn ffordd gydweithredol ystyrlon. Amlygwyd pwysigrwydd data fel sail i benderfyniadau gwybodus, a thynnwyd sylw at adroddiad dichonoldeb y ganolfan ddata fel opsiwn posibl ar gyfer hyn.

Nodwyd bod dogfennau ymgynghori cynnar yn amlygu nod i ddarparu gwybodaeth, cyngor a chyfarwyddyd gyrfaoedd diduedd i holl ddysgwyr Blwyddyn 11 yng Nghymru, a gofynnwyd am sicrwydd na fyddai hyn yn cael ei wanhau yn y blaenoriaethau a roddwyd i’r comisiwn. Amlygwyd pwysigrwydd y cyngor annibynnol diduedd a ddarperir gan Gyrfa Cymru gyda rôl y Comisiwn Addysg Drydyddol ac Ymchwil gan y Bwrdd. Trafodwyd pwysigrwydd ffocws parhaus ar wydnwch ac iechyd meddwl pobl ifanc, ynghyd â gwaith posibl y comisiynau mewn perthynas â niwroamrywiaeth.

Cytunodd y Prif Weithredwyr i gyfarfod yn rheolaidd i sicrhau bod perthynas gadarn yn cael ei sefydlu.

Cam gweithredu 7: Prif Swyddogion Gweithredol i drefnu cyfarfodydd rheolaidd.

8. Cyfrifon rheoli

Nododd yr aelodau y cyfrifon rheoli.

9. Adroddiad perfformiad chwarterol

Trafodwyd yr adroddiad a ddosbarthwyd yn flaenorol gydag agweddau allweddol wedi’u hamlygu.

10. Diweddariad ar sefyllfa cyllideb 2024/25

Rhoddodd y Prif Weithredwr ddiweddariad i'r aelodau ar y trafodaethau parhaus o ran y gyllideb. Nodwyd y diffyg sylweddol yn y gyllideb a amlygwyd gan Lywodraeth Cymru ac felly yr effaith debygol ar gyllideb y cwmni.

Byddai'r cwmni yn gweld gostyngiad yn ei gyllideb, ond nid oedd y ganran wedi'i chadarnhau eto. Roedd yr aelodau'n bryderus ynghylch yr effaith ar allu'r cwmni i ddarparu ei wasanaethau craidd yn erbyn ei strategaeth Dyfodol Disglair gyfredol, ac yn benodol yr effaith bosibl ar y cynnig i fyfyrwyr Blwyddyn 8/9. Roedd y drafodaeth yn cynnwys yr angen i ddefnyddio unrhyw newid fel cyfle i ail-lunio’r model gwasanaeth posibl yn strategol, ac archwilio’n llawn y defnydd o gynnig digidol/cyfunol, wrth gydnabod y broblem o dlodi digidol mewn rhai ardaloedd. Cododd y Bwrdd bryderon hefyd am y gyllideb ar gyfer dyfarniad cyflog teg. Roedd y weithrediaeth a'r tîm uwch-reolwyr yn parhau i weithio'n agos gyda'u tîm noddi i adolygu'r effaith bosibl, gyda'r bwriad o ddiogelu’r gwasanaethau a gynigir i gwsmeriaid.

10.1 Risg a Rheoli Newid

Cafwyd trafodaeth gyffredinol ynghylch y ffordd fwyaf effeithiol o ymdrin â'r newid sylweddol a ddaeth yn sgil y gostyngiad anochel mewn cyllid.

Y consensws oedd bod y cwmni’n canolbwyntio ar adeiladu ei wasanaeth a chanolbwyntio ar gyd-greu i gynnwys yr holl staff, a chwsmeriaid, gan ymgysylltu’n weithredol â rhanddeiliaid hefyd i egluro unrhyw newidiadau. Nodwyd bod y proffesiwn cyngor a chyfarwyddyd gyrfaoedd yn newid, a bod hwn hefyd yn gyfle i'r cwmni ailddychmygu sut y gallai gynnig ei gyngor a'i gyfarwyddyd proffesiynol ac annibynnol.

Amlygwyd pwysigrwydd rheoli disgwyliadau ynghylch yr hyn y gellid ei gyflawni.

Gofynnodd y Bwrdd am gael gwybod am drafodaethau o ran y gyllideb wrth iddynt symud ymlaen i sicrhau cysondeb y neges.

Cam gweithredu 8: Y Prif Swyddog Gweithredol a'r Cadeirydd i roi'r wybodaeth ddiweddaraf i aelodau pan fydd diweddariadau allweddol yn digwydd.

11. Ymgysylltu â chyflogwyr

Cafodd yr aelodau’r wybodaeth ddiweddaraf am drafodaeth ‘cyfarfod bord gron’ ddiweddar a gynhaliwyd gyda Gweinidog yr Economi, Gyrfa Cymru, Partneriaethau Sgiliau Rhanbarthol, addysgwyr a chyflogwyr. Nodwyd mai hwn oedd y cyntaf o dri chyfarfod rhanbarthol a fyddai'n cael eu cynnal. Canolbwyntiwyd ar sut y gellid gwneud cysylltiadau gwell rhwng ysgolion a cholegau a chyflogwyr.

Ystyriwyd bod profiad gwaith yn darparu rhai o'r atebion. Fodd bynnag, nodwyd bod y galw ar adnoddau ar gyfer y dull hwn o weithredu hyd yn oed yn fwy heriol yn yr hinsawdd ariannol bresennol a rhagweladwy. Awgrymwyd y gallai Gyrfa Cymru weithredu mewn rôl eirioli a churadu, gan ddarparu’r sgaffaldiau i gefnogi profiad gwaith ystyrlon.

12. Diweddariad ar seiberddiogelwch a diogelwch gwybodaeth (diweddariad gan yr uwch-berchennog risg gwybodaeth)

Nododd y Bwrdd fod y Pwyllgor Cyllid, Archwilio a Risg yn cael diweddariadau rheolaidd ar y gwaith diogelwch sy'n cael ei wneud gan y cwmni. Mae un o brif risgiau’r cwmni yn parhau i fod yn fygythiad seiberddiogelwch oherwydd bod y bygythiadau a brofir yn soffistigedig ac yn newid yn barhaus.

Mae’r Uwch-berchennog Risg Gwybodaeth yn hyderus yn ymagwedd y cwmni a chanmolodd y tîm TGCh ar y gwaith y mae’n ei wneud i gadw’r cwmni yn ddiogel.

13. Cyfarfodydd Pwyllgorau’R Bwrdd

13.1 Y Pwyllgor Cyllid, Archwilio a Risg

Nodwyd cofnodion y cyfarfod diwethaf, gyda'r Cadeirydd yn amlygu elfennau allweddol o'r trafodaethau.

13.2 Y Pwyllgor Perfformiad ac Effaith

Nodwyd cofnodion drafft y cyfarfod.

Cytunwyd, o ystyried natur gwaith y cwmni, y byddai rôl Diogelu Bwrdd yn ddefnyddiol. Nodwyd bod hon yn rôl sy'n bodoli ar fyrddau eraill a chytunwyd y byddai disgrifyddion rôl yn cael eu rhannu.

Cam gweithredu 9: Cadeirydd i dderbyn disgrifydd a'i rannu gyda'r Pwyllgor Perfformiad ac Effaith er mwyn iddynt enwebu arweinydd.

13.3 Y Pwyllgor Materion Pobl

Nid oedd cofnodion ar gael eto gan mai dim ond yn ystod y dyddiau gwaith diwethaf y cynhaliwyd y cyfarfod. Amlinellodd y Cadeirydd y prif bwyntiau i’w trafod i'r aelodau.

14. Unrhyw fater arall

14.1 Dosbarthu Cofnodion

Cytunwyd y dylid dosbarthu cofnodion y cyfarfodydd cyn gynted â phosibl ar ôl i'r cyfarfod gael ei gynnal.

Cam gweithredu 10: Cofnodion i'w dosbarthu cyn gynted â phosibl yn dilyn cyfarfodydd.

14.2 Cyfarfodydd yn y Dyfodol

Cytunwyd bod cyfuniad o gyfarfodydd rhithwir a chyfarfodydd wyneb yn wyneb yn briodol, gyda chyfarfodydd diwrnod o hyd yn cael eu cynnal wyneb yn wyneb.

14.3 Dyddiad y Cyfarfod Nesaf

Cadarnhawyd y byddai’r cyfarfod nesaf yn cael ei gynnal yn rhithwir ar ddydd Mercher 6 Mawrth.

Cofnod Camau Gweithredu

Tabl yn dangos y log gweithredu

Dogfennau