Blwyddyn i ffwrdd yw amser i ffwrdd o astudio neu waith i ganolbwyntio ar rywbeth arall cyn eich cam nesaf.
Mae rhai pobl yn cymryd blwyddyn i ffwrdd ar ôl addysg. Mae eraill yn cymryd seibiant gyrfa ar ôl gweithio am ychydig flynyddoedd i ailhyfforddi, teithio, gwirfoddoli, neu i ailfeddwl eu cynlluniau.
Beth alla i ei wneud yn ystod blwyddyn i ffwrdd?
Gall blwyddyn i ffwrdd eich helpu i ennill arian, meithrin sgiliau, gwella eich lles, neu newid cyfeiriad. Mae'n gweithio orau pan fydd gennych chi nod clir a chynllun ar gyfer beth sy'n digwydd ar ôl y flwyddyn i ffwrdd.
Mae sawl dewis ar gyfer cymryd blwyddyn i ffwrdd. Dewiswch opsiynau sy'n cyd-fynd â'ch cyllideb, cyfrifoldebau a nodau fel:
- Profiad gwaith neu gysgodi. Mae hon yn ffordd wych o roi cynnig ar syniad gyrfa, meithrin hyder, a chasglu enghreifftiau ar gyfer ceisiadau. Darllenwch sut i gael profiad
- Gwaith â thâl. Gall hyn gynyddu eich incwm, adeiladu eich CV, a datblygu sgiliau gwaith yn y DU neu dramor
- Gwirfoddoli. Ffordd dda o ennill profiad a sgiliau wrth gefnogi achos sy'n bwysig i chi. Darllenwch fwy am wirfoddoli
- Teithio. Cyfle i brofi lleoedd a diwylliannau newydd, ond fel arfer mae angen cyllideb a chynllunio gofalus
- Cyrsiau, ailsgilio neu ailsefyll. Cyfle i ddysgu rhywbeth newydd, adnewyddu eich cymwysterau, neu gael y gofynion mynediad ar gyfer eich cam nesaf
Ydy blwyddyn i ffwrdd yn addas i mi?
Mae blwyddyn i ffwrdd fwyaf defnyddiol pan allwch chi esbonio'n glir beth wnaethoch chi a beth ddysgoch chi.
Dechreuwch gyda'ch rheswm pam. Ydych chi eisiau amser i ffwrdd:
- Ennill arian
- Gwella eich lles
- Cael profiadau newydd
- Teithio
- Ailhyfforddi
- Cymryd amser i feddwl am gyfeiriad newydd
Manteision blwyddyn i ffwrdd
Gall rhai o fanteision cymryd blwyddyn i ffwrdd gynnwys:
- Meithrin hyder ac annibyniaeth
- Amser i ganolbwyntio'n well ar eich camau nesaf, a chyfle i roi cynnig ar wahanol rolau swyddi
- Ennill arian i helpu i leihau costau yn y dyfodol fel prifysgol neu hyfforddiant
- Ychwanegu sgiliau a phrofiad newydd at eich CV
- Gwneud cysylltiadau a allai helpu gyda swyddi yn y dyfodol
- Seibiant o'r drefn arferol a chyfle i brofi pethau gwahanol cyn dychwelyd yn ffres ac yn barod ar gyfer eich cam nesaf
Anfanteision blwyddyn i ffwrdd
Gall rhai o anfanteision cymryd blwyddyn i ffwrdd gynnwys:
- Gwastraffu amser. Os na fyddwch chi'n cynllunio, gall amser basio’n gyflym heb i chi symud tuag at eich nod
- Gall dychwelyd i astudio deimlo'n anodd unwaith y byddwch wedi arfer â theithio neu gyflog llawn amser a threfn wahanol
- Gall rhai opsiynau (yn enwedig teithio) fod yn ddrud a gallen nhw effeithio ar eich cyllideb yn y dyfodol
Cynllunio fy mlwyddyn i ffwrdd
Defnyddiwch eich amser yn ddoeth. Efallai y bydd cyflogwyr a darparwyr hyfforddiant yn gofyn beth wnaethoch chi yn ystod eich blwyddyn i ffwrdd neu seibiant gyrfa, felly cadwch gofnod syml (dyddiadau, gweithgareddau, sgiliau, a'r hyn rydych chi'n ei ddysgu).
Dechreuwch gynllunio trwy:
- Benderfynu ar eich nod. Ai ennill arian, cael profiad, newid gyrfa, gwella lles neu baratoi ar gyfer astudio?
- Dewis eich prif weithgareddau. Gweithio, gwirfoddoli, teithio, gofalu neu astudio?
- Gosod cyllideb. Ystyriwch eich incwm, targed cynilo, a chostau fel teithio, rhent, yswiriant, ac unrhyw gyfarpar y bydd ei angen arnoch
- Dewis amserlen. Faint o amser ydych chi am ei gymryd? Does dim angen cymryd blwyddyn lawn ond nodwch ddyddiad dychwelyd
- Cynllunio eich cam nesaf. Beth hoffech chi wneud pan fyddwch chi'n dychwelyd? Dechrau chwilio am swydd, chwilio am brentisiaeth, neu ymgeisio am gwrs neu brifysgol. Byddwch yn ymwybodol o unrhyw derfynau amser allweddol tra byddwch chi i ffwrdd
Os ydych chi'n cymryd seibiant gyrfa o'r gwaith, gwiriwch eich cyfnod rhybudd, hawl i wyliau, ac unrhyw effaith ar fudd-daliadau neu bensiynau cyn i chi benderfynu.
Os ydych chi'n bwriadu mynd i'r brifysgol ar ôl blwyddyn i ffwrdd, mae'n bwysig ystyried mynediad gohiriedig (dolen Saesneg) ar UCAS a rheolau a newidiadau mewn cyllid ar Gyllid Myfyrwyr Cymru.
Teithio dramor
Darllenwch am y wlad rydych chi'n gobeithio teithio iddi a'i gofynion mynediad cyn i chi drefnu unrhyw beth. Dylech:
- Wirio Foreign travel advice GOV.UK (www.gov.uk) (dolen Saesneg)
- Defnyddio Confused.com wiriwr fisa teithio (dolen Saesneg) i weld os oes angen arnoch fisa safleoedd fisa twristiaeth
- Defnyddio ffynonellau dibynadwy a siarad â phobl sydd wedi gwneud rhywbeth tebyg
- Fod yn ofalus gyda phecynnau blwyddyn i ffwrdd â thâl a chynlluniau gwirfoddoli dramor, cymharwch yr hyn sydd wedi'i gynnwys a cyfanswm y gost
Efallai y byddech hefyd yn hoffi
Gweld sut y gall gwirfoddoli gynyddu eich sgiliau, profiad a chyfleoedd gwaith tra rydych chi’n helpu eraill.
Mae cyflogwyr yn gwerthfawrogi profiad. Cewch wybod sut mae ei gael, gan gynnwys drwy brofiad gwaith, gwirfoddoli ac interniaeth.
Cymorth gyda'ch CV, ffurflenni cais, datganiadau personol, cyfweliadau, canfod swyddi, cysylltu â chyflogwyr a mwy.
