Sgiliau a chryfderau y mae cyflogwyr yn gofyn amdanynt

Bydd gennych well siawns o gael swydd os byddwch yn paru’ch sgiliau a'ch cryfderau i'r hyn y mae cyflogwyr yn chwilio amdanyn nhw.

Nodwch unrhyw sgiliau nad ydych cystal am wneud. Bydd hyn yn eich helpu i nodi meysydd i'w datblygu, yn enwedig os oes angen y sgil hwnnw ar swyddi y mae gennych ddiddordeb ynddyn nhw.

Sgiliau a chryfderau

Edrychwch ar yr 14 sgil y mae cyflogwyr eu heisiau.

Ffynhonnell: ©Lightcast, sgiliau a gymerwyd o hysbysebion swyddi rhwng Rhagfyr 2024 a Tachwedd 2025

1. Sgiliau cyfathrebu

Mae sgiliau cyfathrebu yn cynnwys siarad, ysgrifennu, gwrando a chyfathrebu digidol (sut rydych chi'n cyfathrebu ar-lein). Mae bod yn dda am gyfathrebu yn cynnwys bod yn wrandäwr da, yn gallu egluro pethau'n glir, yn gallu gofyn y cwestiynau cywir a bod yn dda am wrando. Cyfathrebu yw sut rydych chi'n rhyngweithio â phobl eraill.

2. Gwasanaeth cwsmeriaid

Mae gwasanaeth cwsmeriaid yn ymwneud â sut rydyn ni'n trin pobl eraill rydyn ni'n cwrdd â nhw yn ein gweithle. Mae rhoi gwasanaeth cwsmeriaid da yn golygu bod yn gwrtais, trin eraill â pharch, a gwneud ein gorau i roi gwasanaeth da. Gallai hyn olygu gwasanaethu cwsmeriaid mewn siop, ond gallai hefyd olygu ateb e-byst, rhoi esboniadau, neu drin nwyddau yn ofalus fel nad ydynt yn torri.

3. Rheoli

Mae sgiliau rheoli yn gyfuniad o sgiliau gan gynnwys datrys problemau, y gallu i wneud penderfyniadau, bod yn gyfathrebydd da, gallu dirprwyo tasgau i eraill, rheoli amser, trefnu, a’r gallu i ysgogi eraill. Mae rheolyddion fel arfer yn goruchwylio tîm o bobl. Fodd bynnag, gall sgiliau rheoli hefyd olygu rheoli prosiect, neu reoli eich llwyth gwaith eich hun.

4. Talu sylw i fanylion (yn seiliedig ar fanylion)

Mae talu sylw i fanylion yn golygu y dylai eich gwaith fod yn gywir, heb wallau na chamgymeriadau. Mae hyn yn bwysig ar gyfer y rhan fwyaf o swyddi p'un ai ydych yn teipio dogfen neu'n mesur a thorri pren ar safle adeiladu.

5. Gwerthiant

Mae sgiliau gwerthu yn aml yn benodol i rai swyddi. Ond mae sgiliau gwerthu yn cael eu gwerthfawrogi'n fawr gan gyflogwyr. Mae sgiliau gwerthu yn cynnwys y gallu i ddylanwadu ar eraill i brynu gwasanaeth neu gynnyrch, neu i weithredu.

6. Addysgu

Mae addysgu yn golygu'r gallu i esbonio a chyfarwyddo pobl eraill fel eu bod yn dysgu tasg, cysyniad, neu sgil. Mae addysgu yn llawer mwy na sefyll o flaen y dosbarth. Efallai ei fod yn esbonio sut i wneud eich swydd i weithiwr newydd. Mae sgiliau addysgu hefyd yn golygu gallu cyfathrebu gwybodaeth newydd mewn ffordd glir a syml. Mae'n cynnwys mentora a helpu eraill i ddysgu.

7. Arwain

Gall arweinydd da ddylanwadu, ysgogi ac arwain eraill. Pan fydd gennych sgiliau arwain gallwch ysgogi ac arwain eraill tuag at gyflawni nod. Nid yw sgiliau arwain ar gyfer rheolyddion yn unig. Er enghraifft, gall hyfforddydd chwaraeon fod yn arweinydd.

8. Gweithrediadau

Gweithrediadau yw'r gallu i gadw busnes i redeg yn esmwyth. Er enghraifft, efallai eich bod yn gwirio bod gennych ddigon o staff, ac yn trefnu rotâu. Neu, efallai eich bod yn sicrhau bod gan y busnes yr holl gyflenwadau sydd eu hangen arno i gyflawni ei weithgareddau.

9. Cynllunio

Cynllunio yw'r gallu i feddwl ymlaen llaw a gwneud penderfyniadau am y camau y byddwch yn eu cymryd yn y dyfodol. Pan fyddwch chi'n cynllunio, rydych chi'n gosod nodau, ac yn blaenoriaethu pa dasg y byddwch chi'n ei gwneud yn gyntaf, yna'n ail, yna nesaf. Gall cynllunio olygu sut rydych chi’n mynd i wneud tasg neu weithgaredd. Gallai cynllunio hefyd olygu sut rydych chi'n mynd i ddefnyddio amser ac arian yn y dyfodol.

10. Iaith Saesneg

Mae llawer o swyddi yn gofyn am sgiliau iaith Saesneg fel hanfodol neu ddymunol. Gall hyn olygu gallu cyfathrebu'n dda â'ch cydweithwyr neu gwsmeriaid yn Saesneg neu allu ysgrifennu'n glir ac yn gywir yn Saesneg.

11. Datrys problemau

Mae gallu datrys problem yn sgil werthfawr y gofynnir amdani mewn llawer o ddiwydiannau a swyddi. Mae'n golygu eich bod yn gallu gweithio allan beth sy'n achosi problem mewn proses neu weithgaredd a dod o hyd i ffyrdd o oresgyn y broblem honno.

12. Sgiliau trefnu

Sgiliau trefnu yw'r gallu i drefnu a rheoli eich tasgau ac amser i gyflawni pethau. Gallai hyn olygu y gallwch drefnu swydd ran-amser o amgylch eich gwaith ysgol neu goleg. Gallai olygu gwneud rhestr o bethau i'w gwneud a'i dilyn er mwyn cyflawni popeth sydd ar y rhestr. Gall bod yn drefnus hefyd olygu cynllunio eich diwrnod a chadw at y cynllun.

13. Cyfathrebu rhyngbersonol

Cyfathrebu rhyngbersonol yw'r ffordd rydych chi'n rhannu gwybodaeth, teimladau a syniadau gydag eraill. Mae'n cynnwys yr hyn rydych chi'n ei ddweud, tôn eich llais ac iaith eich corff. Mae cyfathrebu rhyngbersonol da hefyd yn golygu gwrando ar yr hyn y mae eraill yn ei ddweud a dangos eich bod chi'n talu sylw. Mae sgiliau rhyngbersonol yn rhan o sgiliau cyfathrebu sy'n canolbwyntio ar fod wyneb yn wyneb, fel cael sgwrs, cyswllt llygad, a gwrando'n dda.

14. Y Gymraeg

Mae rhai swyddi a hysbysebir yng Nghymru yn gofyn am y Gymraeg fel sgil hanfodol neu ddymunol. Gall sgiliau Cymraeg fod yn hanfodol ar gyfer rhai swyddi mewn diwydiannau gan gynnwys gwasanaethau cymdeithasol ac addysg. Dysgwch fwy am fanteision dysgu Cymraeg a'r Gymraeg - sgil werthfawr i'r gwaith.

Sgiliau eraill y mae cyflogwyr eu heisiau

Mae sgiliau eraill y mae cyflogwyr yn eu gwerthfawrogi yn cynnwys:

• Brwdfrydedd
• Hunan-gymhelliant
• Gwaith tîm
• Rheoli amser
• Arloesi (meddwl am ffyrdd newydd o wneud pethau)

Sgiliau digidol

Mae’r rhan fwyaf o swyddi’n cynnwys defnyddio rhywfaint o sgiliau Technoleg Gwybodath a digidol. Mae’r sgiliau digidol y gallai fod eu hangen arnoch chi yn y gwaith yn cynnwys:

• Defnyddio cyfrifiadur neu ffôn symudol
• Pori’r we
• Ysgrifennu ac anfon negeseuon e-bost neu negeseuon gan ddefnyddio’r cyfryngau cymdeithasol
• Mynychu cyfarfodydd ar-lein
• Defnyddio rhaglenni meddalwedd sy’n benodol i’r swydd

Mae technolegau newydd yn creu swyddi digidol newydd, er enghraifft Arbenigydd Argraffu 3D a Pheiriannydd Deallusrwydd Artiffisial (AI).

Sgiliau swydd-benodol

Mae gan lawer o swyddi sgiliau sy'n benodol i'r swydd honno. Ewch i Gwybodaeth am Swyddi a theipiwch deitl swydd i ddysgu am sgiliau penodol i swyddi y mae gennych ddiddordeb ynddynt.

Mwy am sgiliau a chryfderau

Efallai y byddech hefyd yn hoffi

Gwyliwch y fideo