Gallwch chi weld eich Cynghorydd Gyrfa fwy nag unwaith i siarad am eich syniadau a'ch opsiynau gyrfa. Gall eich Cynghorydd Gyrfa eich helpu chi mewn ffyrdd eraill hefyd.
Dewch i ni weld y ffyrdd eraill y gall Cynghorydd Gyrfa eich helpu chi. Maen nhw’n gallu:
1. Trefnu ymweliadau neu sgyrsiau i chi gyda cholegau a darparwyr hyfforddiant
Efallai yr hoffech chi ddarganfod mwy am goleg neu ddarparwr hyfforddiant. Gall eich Cynghorydd Gyrfa drefnu ymweliad i chi, neu ofyn i'r darparwr gysylltu â chi.
2. Eich helpu i lenwi'ch ffurflen gais coleg
Fydd eich Cynghorydd Gyrfa ddim yn gwneud hyn ar eich rhan ond gallan nhw eich helpu i ddeall y cwestiynau a'ch helpu chi i feddwl am beth i'w ysgrifennu.
3. Dweud wrthych chi pa gymorth y bydd ei angen arnoch mewn coleg/hyfforddiant
Os ydych chi wedi cael cefnogaeth yn yr ysgol, dylech allu cael cefnogaeth yn y coleg ac ar hyfforddiant. Bydd eich Cynghorydd Gyrfa yn siarad â chi am hyn a gall roi gwybod i'r coleg neu'r darparwr hyfforddiant beth sydd ei angen arnoch er mwyn eich helpu.
4. Dweud wrth eich rhieni beth sydd angen digwydd nesaf
Gall eich Cynghorydd Gyrfa gael sgwrs gyda'ch rhieni i drafod eich syniadau os mai dyna’r hoffech chi iddyn nhw’i wneud.
5. Siarad â phobl eraill sy’n gallu eich helpu chi
Efallai y bydd rhai pethau na fydd eich Cynghorydd Gyrfa yn gallu eich helpu gyda nhw. Gallan nhw ddod o hyd i rywun a all eich helpu trwy siarad ag asiantaethau eraill ar eich rhan.