Astudio dramor

Mae astudio dramor yn ddewis cyffrous a allai gynnig llawer o fanteision. Beth am weld sut allai wneud gradd neu ran o’ch gradd dramor fod y dewis iawn i chi.

Pam astudio dramor?

Gall byw ac astudio mewn gwlad arall fod yn brofiad bythgofiadwy.

Cewch sgiliau y mae cyflogwyr yn eu gwerthfawrogi. Gall astudio dramor roi mantais i chi dros raddedigion eraill pan fyddwch chi'n ymgeisio am swyddi.

Mae astudio rhyngwladol yn rhoi cyfle i chi:

• Ddatblygu hyder ac annibyniaeth
• Gwella sgiliau cyfathrebu ac iaith
• Cwrdd â phobl newydd a gwneud ffrindiau o bob cwr o'r byd
• Datblygu gwahanol safbwyntiau diwylliannol a chymdeithasol

Mae gan UCAS wybodaeth ddefnyddiol i'ch helpu i benderfynu a fyddai astudio dramor (dolen Saesneg) yn gweddu i chi.

Astudio dramor fel rhan o radd yn y DU

Mae llawer o brifysgolion y DU yn cynnig rhaglenni cyfnewid neu bartneriaethau gyda sefydliadau tramor. Byddai’r rhain yn eich galluogi i dreulio rhan o’ch amser dramor wrth wneud eich gradd.

Mae pob cais am gyrsiau addysg uwch yn y DU yn cael eu gwneud trwy UCAS.

Os ydych ar gwrs gradd gyda phrifysgol yn y DU a'ch bod yn bodloni’r meini prawf eraill, gallwch wneud cais am gyllid gan Cyllid Myfyrwyr Cymru. Mae ganddyn nhw gymorth ychwanegol i fyfyrwyr sy'n astudio dramor hefyd.

Mae darparwyr addysg yn delio â chyllid ar gyfer astudio dramor gan:

• Cynllun Turing (dolen Saesneg)
• Lleoliadau astudio neu waith Taith
• Erasmus+ (dolen Saesneg)

Mae gan UCAS (dolen Saesneg) wybodaeth ynghylch:

• Grantiau teithio
• Cynlluniau cyllido
• Ble i ddod o hyd i ysgoloriaethau a bwrsariaethau

Gwneud gradd gyfan dramor

Gwnewch yn siŵr eich bod yn ymchwilio ac yn cynllunio'n dda os ydych chi'n ystyried gwneud gradd gyfan dramor. Bydd y broses ymgeisio, ffioedd cwrs a chostau byw yn amrywio mewn gwledydd eraill.

Bydd angen i chi feddwl am sut i ariannu'r cwrs. Ni allwch wneud cais am gyllid gan Cyllid Myfyrwyr Cymru os ydych chi'n dechrau ac yn gorffen eich cwrs y tu allan i'r DU.

Efallai y bydd gan y brifysgol rydych chi'n ei ystyried wybodaeth a allai eich helpu. Er enghraifft, cyfleoedd cyllid neu ysgoloriaeth.

Mae gan UCAS wybodaeth ddefnyddiol gan gynnwys beth i'w ddisgwyl os ydych am wneud cais i astudio eich cwrs cyfan dramor (dolen Saesneg).

Penderfynu ble i astudio

Mae gan Prospects (dolen Saesneg) awgrymiadau ar gyfer astudio dramor a gwybodaeth am astudio mewn gwahanol wledydd. Mae'n cynnwys pethau fel fisas myfyrwyr, ffioedd cwrs a rhaglenni cyfnewid.

Mae nhw’n rhoi’r wybodaeth ganlynol am y gwledydd sydd wedi’u cynnwys:

• Gwybodaeth am ofynion iaith
• Cymhariaeth â chymwysterau'r DU
• Dolenni i ragor o wybodaeth

Efallai y byddech hefyd yn hoffi