Fel cyflogwr bach, gall dod o hyd i amser i gefnogi gweithgareddau fod yn her. Mae hyn yn golygu bod cwmpas yr hyn y mae busnesau Natasha Baker wedi'i gyflawni mor arbennig.
Natasha yw perchennog Kidslingo. Mae'r busnes yn addysgu Ffrangeg a Sbaeneg i blant hyd at 11 oed. Yn ystod y flwyddyn ddiwethaf, mae hi hefyd wedi agor Meithrinfa Wibli Wobli, y feithrinfa Gymraeg gyntaf yng Nghasnewydd.
Dod â gwahanol bynciau'n fyw
Mae Natasha’n cefnogi athrawon ac yn helpu dysgwyr i ddeall y cyfleoedd y gall astudio Ffrangeg, Sbaeneg a Chymraeg eu cynnig. Fel cyfreithwraig gymwysedig, mae Natasha hefyd wedi siarad â dysgwyr am astudio'r gyfraith.
A chan fod ganddi brofiad o sefydlu a rheoli ei busnesau ei hun, mae mewnwelediad Natasha hefyd wedi cyfoethogi pynciau eraill. Mae dysgwyr astudiaethau busnes a Bagloriaeth Cymru wedi elwa o gael gwybod am bob agwedd ar redeg busnes.
Hyblygrwydd ac ymrwymiad
Mae Natasha wedi cefnogi ysgolion ar draws De-ddwyrain Cymru. Mae dysgwyr mewn 5 awdurdod lleol gwahanol wedi elwa o gysylltiad ag un o'i busnesau.
Darparwyd y cymorth yn y ffyrdd canlynol:
- Cyflwyniadau wyneb yn wyneb ac ar-lein
- Fideos i gefnogi Wythnos Darganfod Gyrfa
- Presenoldeb mewn digwyddiadau ysgol
Profiad gwaith yn y Gymraeg
Mae busnes arall Natasha, Meithrinfa Wibli Wobli, hefyd yn cynnig lleoliadau profiad gwaith. Mae hwn yn gyfle gwych i ddysgwyr sy’n astudio’r Gymraeg ac yn hyderus i siarad â phlant oed meithrin i ennill profiad amhrisiadwy o fyd gwaith.
Enillydd gwobr
Enillodd Kidslingo'r wobr am y ‘Busnes Bach Mwyaf Cefnogol’ yng Ngwobrau Partneriaid Gwerthfawr 2023.
Dywedodd Natasha, “Mae’r wobr hon yn golygu llawer, yn enwedig fel busnes bach. Rwy’n teimlo’n ddiolchgar iawn fy mod i'n cael y cyfle i weithio gydag ysgolion a gwneud gwahaniaeth i’r myfyrwyr rwy’n cwrdd â nhw.”
Mae Yvonne Carroll, cynghorydd cyswllt busnes gyda Gyrfa Cymru, yn gweithio gyda Natasha.
Dywedodd, “Mae Natasha bob amser yn awyddus i rannu ei hangerdd am ieithoedd â dysgwyr. Mae ganddi hefyd brofiad gwerthfawr fel perchennog busnes i'w rannu. Er gwaethaf y gofynion niferus ar ei hamser, mae'n gwneud beth bynnag a all ei wneud i'n cefnogi. Mae hyn yn golygu ei bod yn enillydd teilwng o’r wobr hon.”
Explore
Gyda chefnogaeth Gyrfa Cymru fe allwch chi wneud gwahaniaeth gwirioneddol i fywydau pobl ifanc, a chael budd i'ch busnes.
Dysgwch sut y gallwn eich cefnogi i weithio gydag ysgolion er budd dysgwyr a'ch sefydliad.
Mae’r Gwobrau Partneriaid Gwerthfawr yn ffordd i Gyrfa Cymru gydnabod a diolch i’r busnesau a fu’n gweithio gyda ni ac yn rhan hanfodol o gefnogi ysgolion a phobl ifanc i ymgysylltu â’r byd gwaith.