Gallai plant yn yr ysgol gynradd ymddangos yn rhy ifanc i ddechrau meddwl am yrfaoedd. Ond mae nhw'n dechrau datblygu syniadau am y byd o'u cwmpas a'r swyddi y gallen nhw eu gwneud o oedran cynnar.
Dewisiadau a phenderfyniadau
Does dim syndod nad oes unrhyw benderfyniadau gyrfa i'w gwneud yn yr ysgol gynradd. Ond bydd plant yn dechrau datblygu eu dealltwriaeth o fyd gwaith.
Gallai gwaith gyrfaoedd yn yr ysgol gynradd gynnwys:
- Deall pam mae pobl yn gweithio
- Helpu plant i weld bod llawer o swyddi gwahanol
- Eu hannog i fod yn gyffrous am y dyfodol a'i bosibiliadau
- Herio stereoteipiau a'u helpu i wybod bod cyfleoedd yno i bawb
- Dechrau dysgu a deall y geiriau rydyn ni'n eu defnyddio i siarad am swyddi, gwaith a sgiliau
- Dechrau adnabod yr hyn y maent yn hoffi a ddim yn hoffi gwneud
- Sylweddoli bod hobïau a diddordebau yn help i ddatblygu sgiliau defnyddiol
- Eu helpu i ddeall y bydd gwneud eu gorau yn rhoi mwy o ddewisiadau iddynt yn y dyfodol
Ffyrdd rydym yn cefnogi eich plentyn
Mae gennym adnoddau i athrawon ysgolion cynradd eu defnyddio gyda disgyblion.
Mae'r rhain yn cynnwys:
- Dinas Gyrfaoedd - i annog trafodaeth a chodi ymwybyddiaeth
- CrefftGyrfaoedd - ar gael yn y Minecraft Marketplace
- Fideos byr 'Sôn am Swyddi' ar YouTube sy’n dangos swyddi gwahanol a'r sgiliau sydd eu hangen
Mae ein cydlynwyr gyrfaoedd a phrofiadau cysylltiedig â gwaith yn cynnal digwyddiadau hyfforddi ar gyfer athrawon cynradd. Mae'r rhain yn eu helpu i gynnwys gyrfaoedd yn eu gwersi.
Ym mis Chwefror bob blwyddyn mae ein Partneriaeth Addysg Busnes yn gwahodd ysgolion cynradd i gymryd rhan yn yr Wythnos Darganfod Gyrfa. Digwyddiad ar-lein yw hwn gyda gwybodaeth a gweithgareddau sy’n cynnwys cyflogwyr ledled Cymru.
Mae gennym awgrymiadau i helpu ysgolion cynradd i gael cyflogwyr i mewn i'r ystafell ddosbarth. Os ydych chi’n caru eich swydd, beth am gynnig ymweld ag ysgol eich plentyn i siarad â’r disgyblion?
Amser i siarad
Bydd sgyrsiau cynnar am waith a syniadau gyrfa yn helpu’ch plentyn. Maent yn fodd i ddatblygu geirfa ddefnyddiol a hyder. Mae'n rhoi digon o amser i'ch plentyn fyfyrio ar ei syniadau a'i ddewisiadau – ac i newid eu meddwl. Ac mae'n ei gwneud hi'n haws cael sgyrsiau ystyrlon yn nes ymlaen pan fydd yn rhaid i'ch plentyn wneud penderfyniad.
Rhowch gynnig ar y syniad yma...
Mae ein fideos 'Sôn am Swyddi' yn gasgliad o fideos 2 i 3 munud ar YouTube sy’n dangos y profiad o wneud swyddi gwahanol. Gallech chi ddefnyddio'r rhain fel man cychwyn ar gyfer sgwrs.
Gofynnwch i'ch plentyn:
- Pa un hoffen nhw wylio gyntaf?
- Pam dewis yr un yna?
- Beth mae nhw'n feddwl bod swydd yn ei gynnwys?
- Ydyn nhw'n meddwl y bydden nhw'n hoffi gwneud y gwaith hwnnw? Pam? Pam ddim?
Gwyliwch y fideo gyda'ch gilydd a sgwrsiwch am yr hyn rydych chi wedi'i weld.
Nawr fe allech chi archwilio:
- A oedd y swydd fel yr oeddent yn ei ddisgwyl?
- Beth yn eu barn nhw oedd y peth gorau am y swydd?
- Beth oedd y peth gwaethaf am y swydd?
- Ydyn nhw'n teimlo'n wahanol ac a fydden nhw'n hoffi gwneud y swydd honno nawr?
- Hoffen nhw wylio un arall?
- Hoffen nhw ddysgu mwy am swydd benodol? Efallai un sydd heb ei gynnwys yn y fideos.
Defnyddiwch Gwybodaeth am Swyddi i ddysgu mwy am dros 700 o swyddi gwahanol.
