Mae Gyrfa Cymru yn llunio arolwg blynyddol o'r rhai sydd wedi gadael yr ysgol ar ran Llywodraeth Cymru. Mae'r arolwg yn rhoi darlun defnyddiol o hynt disgyblion.
Mae hynt disgyblion yn cael eu hadrodd fesul grŵp blwyddyn. Hynt disgybl yw eu gweithgaredd hysbys ar 31 Hydref ar ôl iddynt adael y grŵp blwyddyn hwnnw. Er enghraifft, mae hynt Blwyddyn 11 yn dangos gweithgaredd disgyblion y mis Hydref ar ôl iddynt adael y flwyddyn ysgol honno.
Ynglŷn â’r arolwg hynt
Rydym yn llunio'r arolwg o'r data a ddarparwyd i ni. Rydym yn dibynnu ar sefydliadau partner yn rhannu gwybodaeth myfyrwyr i roi darlun mor llawn â phosibl.
Mae'r arolwg yn llywio cydweithwyr yn eu gwaith gyda chwsmeriaid, rhieni, athrawon a chyflogwyr. Mae'r data hefyd yn helpu partneriaid sy'n ymwneud â chynllunio cyfleoedd dysgu, hyfforddiant a chyflogaeth.
Mae'r arolwg yn edrych ar y llwybrau dilyniant a ddewisir gan bobl ifanc. Mae'r rhain yn cynnwys y canlynol:
- Addysg
- Cyflogaeth
- Hyfforddiant
Rydym yn darparu dadansoddiad pellach yn seiliedig ar ethnigrwydd a rhyw disgyblion, lle mae'r wybodaeth ar gael.
Pwy mae'r arolwg yn ei gynnwys?
Mae arolwg eleni yn adrodd am hynt 55,715 o ddisgyblion o ysgolion uwchradd ledled Cymru. Mae'n cynnwys:
- Disgyblion sydd wedi cyrraedd oedran gadael statudol ym Mlwyddyn 11
- Disgyblion sy’n gadael yr ysgol ym Mlynyddoedd 12 a 13
- Disgyblion o ysgolion arbennig yn y grwpiau blwyddyn hyn
Nid yw’r arolwg yn cynnwys disgyblion sy’n mynychu:
- Colegau Addysg Bellach (AB)
- Ysgolion annibynnol
Mae bechgyn yn cyfrif am 49.2% o'r garfan gyfan (27,430 o unigolion) a merched yn cyfrif am 50.7% (28,252 o unigolion). Nododd 33 o ddisgyblion eu bod yn y categori arall ac mae’n well gennyf beidio â dweud ar gyfer rhyw.
Pwyntiau i'w nodi
2022 oedd y flwyddyn gyntaf ers 2019 i ddysgwyr sefyll arholiadau allanol yng Nghymru. Ni chafwyd unrhyw arholiadau allanol yn 2020 na 2021 oherwydd pandemig COVID-19. Dyfarnwyd canlyniadau'r blynyddoedd hyn ar sail graddau a ddyfarnwyd gan y ganolfan.
Canran disgyblion Blwyddyn 11 yn gadael yr ysgol yn 2022 ac yn dychwelyd i addysg amser llawn yw’r isaf ers 2014, sef 87.8% ac eithrio 2018 pan oedd yn 86.4%
Yn 2020, gwelwyd y ganran uchaf erioed o ddisgyblion Blwyddyn 11 yn gadael yr ysgol ac yn dychwelyd i addysg amser llawn (90.4%). Yn 2021, gwelwyd y ganran uchaf heblaw am un (88.6%)
Yn 2018, fodd bynnag, roedd cyfradd ‘Dim Ymateb’ uchel iawn. Yn dilyn cyflwyno Y Rheoliad Cyffredinol ar Ddiogelu Data (GDPR), ni fu’n bosibl cytuno ar gytundebau rhannu data gyda’r holl sefydliadau mewn pryd ar gyfer arolwg 2018.
Yn 2022, roedd canran y rhai sy’n gadael yr ysgol ym Mlwyddyn 11 y gwyddys nad ydynt mewn addysg, cyflogaeth na hyfforddiant (NEET) (2.1%) yr uchaf ers 2015.
Wrth gymharu â blynyddoedd eraill, felly, mae’n bwysig ystyried ffactorau amrywiol, gan gynnwys y problemau rhannu data a effeithiodd ar y gyfradd ‘Dim Ymateb’ yn 2018.
Noder:
- Mae’r canrannau wedi’u talgrynnu ac felly ni fydd y cyfanswm yn 100% bob tro
- Gallai ffigyrau cenedlaethol guddio amrywiannau ar lefel rhanbarthau, awdurdodau lleol a sefydliadau ym mhob carfan. Rydym yn darparu hynt disgyblion fesul ardal awdurdod lleol er mwyn cynorthwyo’r gwaith dadansoddi ar lefel leol
- Dim ond cynrychiolaeth weledol yw’r graffigwaith ac nid yw ar raddfa fanwl gywir o reidrwydd
Gweld ffigurau cyffredinol hynt disgyblion Blwyddyn 11 o ysgolion yng Nghymru 2022.
Gweld ffigurau cyffredinol hynt disgyblion Blwyddyn 12 o ysgolion yng Nghymru 2022.
Gweld ffigurau cyffredinol hynt disgyblion Blwyddyn 13 o ysgolion yng Nghymru 2022.
Diffiniadau
| Addysg Amser Llawn | y rhai sydd mewn addysg am fwy nag 16 awr yr wythnos. |
| Addysg Bellach (AB) | Addysg Bellach mewn coleg, yn cynnwys colegau trydyddol ôl-16 yn hytrach na mewn chweched dosbarth mewn ysgol (blynyddoedd 12 ac 13). |
| Addysg Ran-amser | Y rhai sydd mewn addysg ran-amser am 16 awr neu lai yr wythnos. Dyma’r rhai oedd yn arfer bod yn y categori NEET ond sydd wedi’u cofnodi ar wahân ers 2009. |
| Blwyddyn i Ffwrdd | Dim ond y rhai ar flwyddyn ffurfiol i ffwrdd (h.y. y rhai sydd wedi gwneud cais i UCAS a chael mynediad wedi’i ohirio i Addysg Uwch) sy’n cael eu cynnwys yn y ffigurau blwyddyn i ffwrdd. Mae unigolion sydd heb fynd i Addysg Uwch, ond sy’n meddwl am wneud cais wedi’u cynnwys o dan cyrchfannau perthnasol eraill (ar 31 Hydref yn dilyn dyddiad gadael yr ysgol). |
| Grwpiau lleiafrifoedd ethnig | Cyfanswm cyfunol ar gyfer Gwyn a Du Caribïaidd Cymysg; Gwyn a Du Affricanaidd Cymysg; Gwyn ac Asiaidd Cymysg; Cymysg Arall; Indiaidd, Pacistanaidd; Bangladeshaidd; Asiaidd Arall; Caribïaidd; Affricanaidd; Du Arall; Tsieinïaidd; Grŵp Ethnig Arall. |
| Gwyn | Cyfanswm cyfunol ar gyfer Gwyn Prydeinig; Gwyn Gwyddelig; Gwyn Arall. |
| Hyfforddiant yn y Gweithle | Mae hyn yn cynnwys Prentisiaethau Modern a hyfforddiant arall a ariennir gan y Llywodraeth. |
| Hyfforddiant yn y Gweithle – statws anghyflogedig | Mae hyn yn cynnwys pob math o hyfforddiant yn y gweithle heb statws cyflogedig a ariennir gan y Llywodraeth. |
| Nad ydynt mewn addysg, cyflogaeth na hyfforddiant (NEET) | Mae hyn yn cynnwys y rhai nad ydynt ar gael i weithio a’r rhai di-waith. Roedd pobl ifanc mewn addysg ran-amser (16 awr neu lai yr wythnos) yn arfer bod yn rhan o’r categori hwn ond maent wedi’u cofnodi ar wahân ers 2009. |
| Wedi gadael yr ardal | Y rhai sydd wedi gadael Cymru. |