Opsiynau ar gyfer newid gyrfa

Ydych chi'n ystyried newid gyrfa? Bydd pobl yn newid swydd ar wahanol adegau o’u gyrfa am wahanol resymau.

Gallai fod i:

• Ennill mwy o arian
• Gael telerau ac amodau gwell
• Gael cydbwysedd gwell rhwng bywyd a gwaith
• Roi cynnig ar bethau newydd, neu
• Am resymau sy’n eu gorfodi i wneud hynny megis problemau iechyd

Beth bynnag fo’ch rhesymau, ceisiwch fod yn bositif a chymryd y camau nesaf i ddechrau o’r newydd.

8 cam tuag at newid eich gyrfa

1. Adnabod eich sgiliau trosglwyddadwy

Sgiliau trosglwyddadwy yw’r sgiliau sydd gennych y gellir eu defnyddio mewn mathau eraill o swyddi, sef sgiliau y gallwch eu trosglwyddo i swydd arall.

Defnyddiwch y rhestr hon i adnabod eich sgiliau trosglwyddadwy:

a) Meddyliwch am ddiwrnod neu wythnos arferol yn y gwaith. Rhestrwch yr holl dasgau rydych yn eu gwneud bob dydd, y rhai mawr a bach. Gwnewch hyn ar gyfer eich swydd bresennol, swyddi blaenorol ac unrhyw waith gwirfoddol neu gyfrifoldebau y tu allan i’r gwaith hefyd.

b) Edrychwch ar eich swydd-ddisgrifiadau blaenorol a phresennol a gwnewch restr o’r holl dasgau a wnaethoch yn y swyddi hynny

c) Dylech adolygu eich tystysgrifau a’ch cymwysterau a rhestru’r pethau y gwnaethoch eu dysgu ohonynt, a’r sgiliau a gawsoch yn sgil gwneud yr hyfforddiant. Cofiwch, yn ogystal â dysgu sgil benodol, rydych wedi gwella eich sgiliau TG, ymchwil neu sgiliau eraill drwy wneud yr aseiniadau

d) Dylech ganfod a rhestru eich cryfderau - pethau megis cyfathrebu, sgiliau trefnu a gwaith tîm. Os nad ydych yn siŵr gofynnwch i bobl rydych yn ymddiried ynddynt i roi gwybod i chi beth rydych yn ei wneud yn dda yn eu barn hwy, neu ddarllen geirdaon a gawsoch yn y gorffennol.

Nawr mae gennych restr o sgiliau trosglwyddadwy y gallwch eu defnyddio i:

• Baru eich sgiliau â gwahanol swyddi
• Helpu i ysgrifennu eich CV neu wneud cais am wahanol swydd
• Canfod unrhyw fylchau mewn sgiliau (efallai y bydd angen mwy o brofiad neu hyfforddiant arnoch)

2. Asesu’r risgiau a’r manteision cyn i chi wneud eich penderfyniad

Mae newid gyrfa yn gam mawr felly mae’n bwysig gwybod beth yw’r risgiau a’r manteision cyn i chi newid.

Ymysg y manteision posibl ceir:

• Mwy o foddhad swydd
• Cydbwysedd gwell rhwng bywyd a gwaith
• Posibilrwydd o gael dyrchafiad
• Cyflog uwch
• Oriau gwaith gwahanol (mwy neu lai o oriau)
• Gwell sicrwydd/sefydlogrwydd swydd

Ymysg y risgiau posibl mae:

• Cost ariannol ailhyfforddi, a/neu dderbyn cyflog is, neu swydd gyda llai o oriau
• Argaeledd yn y math o swydd rydych yn chwilio amdani
• Llai o ddiogelwch/sefydlogrwydd swydd
• Llai o gydbwysedd rhwng bywyd a gwaith
• Teithio ymhellach i’r gwaith

Dylech bwyso a mesur y risgiau a’r manteision yn ofalus.

Gweld ein taflenni Gwybodaeth am Swyddi i wybod mwy am gyflogau, oriau a'r hyfforddiant sydd ei angen cyn i chi wneud penderfyniad.

3.Canfod pa hyfforddiant a chymwysterau sydd eu hangen arnoch

Os oes gennych yrfa mewn golwg, defnyddiwch ein taflenni Gwybodaeth am Swyddi i ganfod pa gymwysterau neu hyfforddiant sydd eu hangen arnoch.

Chwiliwch am gyrsiau gwahanol yng Nghymru - Chwilio am Gwrs.

Dylech ystyried prentisiaethau, gan y gallai prentisiaethau fod ar gael ar gyfer y swydd rydych yn chwilio amdani. Gwybod mwy am Brentisiaethau.

4. Cael syniadau i newid gyrfa sy’n cyd-fynd â’ch sgiliau a’ch diddordebau

Rydych am ddod o hyd i swydd y byddwch yn ei fwynhau. Gall dod o hyd i swydd sy'n defnyddio eich sgiliau a'ch diddordebau olygu eich bod yn dod o hyd i swydd sy'n eich gweddu'n berffaith.

Rhowch gynnig ar ein Cwis Paru Gyrfa er mwyn paru eich atebion â swyddi addas.

5. Gwybod sut a ble i chwilio am swyddi a chyfleoedd

Mae'n bwysig cadw eich holl opsiynau ar agor i roi'r cyfle gorau i chi'ch hun i ddod o hyd i lawer o gyfleoedd gwaith.

Edrychwch ar Cael swydd i gael gwybodaeth am wefannau swyddi, dod o hyd i swyddi ar-lein, gwaith asiantaeth recriwtio a llawer mwy.

Dechrau feddwl am sut mae'r farchnad lafur yn effeithio ar swyddi a pha swyddi bydd mewn galw. Edrych ar Dyfodol gwaith yng Nghymru am fwy o wybodaeth.

6. Ysgrifennu neu ddiweddaru eich CV

Mae sicrhau bod eich CV yn gyfoes ac yn cynnwys gwybodaeth am eich cyflogaeth, sgiliau a phrofiadau diweddaraf yn allweddol. Mae'n golygu, Mae os ydych yn gweld swydd rydych eisiau, y byddwch yn barod i wneud cais amdani.

Edrychwch ar Creu CV am wybodaeth ar beth i'w gynnwys mewn CV ac i weld esiamplau.

7. Ymarfer eich sgiliau cyfweld

Ymarfer er mwyn perffeithio'r dechneg. Mae'n bwysig i baratoi o flaen cyfweliad er mwyn gwella eich siawns o gael y swydd.

Edrychwch ar ein cyngor Technegau cyfweld.

8. Cysylltu â ni am gefnogaeth

Gall ein cynghorwyr gyrfa hyfforddedig a'n staff eich cefnogi trwy'r broses o newid gyrfa. Gallwn eich helpu i nodi'ch sgiliau, dod o hyd i hyfforddiant a chyllid, a thrafod a chadarnhau eich syniadau gyrfa. Gallwn hefyd eich helpu i ysgrifennu CV neu i wella eich technegau cyfweld.

Cysylltwch â ni dros y ffôn, e-bost, sgwrs ar-lein neu gofynnwch am alwad yn ôl os yw'n well gennych. Rydym hefyd yn gweithio mewn canolfannau o amgylch Cymru felly defnyddiwch ein map rhyngweithiol i ddod o hyd i leoliad yn agos atoch chi i gael trafod wyneb yn wyneb.

Efallai y byddech hefyd yn hoffi